«Բելլա» փոթորիկը մոլեգնում է Բելգիայում եւ Ֆրանսիայում. քամու ուժգնությունը գերազանցում է 100 կմ/ժ-ը
Նախօրեին բրիտանական կղզիներում մոլեգնող «Բելլա» փոթորիկը կիրակի գիշերը հասել է Բելգիա,
Քամու արագությունը տարբեր համայնքներում, այդ թվում՝ Բրյուսելում, հասնում է 80-100 կմ/ժ-ի: Ծովափին գրանցվել է քամու մինչեւ 120 կմ/ժ արագություն:
Բելգիայում Թագավորական օդերեւութաբանական ինստիտուտը հայտարարել է եղանակային վտանգի նարնջագույն աստիճան Լյոժ, Նամյուր եւ Լյուքսեմբուրգ նահանգներում ավտոմեքենաների շարժման համար, որտեղ կիրակի գիշերը սկսվել են ձյան առատ տեղումներ եւ գրանցվել է ճանապարհներին մերկասառույց:
ԶԼՄ-ների հաղորդմամբ՝ փրկարարներն անդադար աշխատում են ընկած ծառերից եւ ճյուղերից ճանապարհները մաքրելու ուղղությամբ:
Բրյուսելում քամու պատճառով փակ են այգիների եւ անտառային գոտիների մուտքը: Երկուշաբթի գիշերը մերկասառույց է սպասվում ամբողջ երկրում:
Մինչդեռ իշխանությունները դեռեւս փոթորկի հասցրած վնասը գնահատում են որպես աննշան:
Ուժգին քամիներ են գրանցվել կիրակի Ֆրանսիայի հյուսիս-արեւմուտքում, իսկ երեկոյան քամիներ են սպասվում նաեւ երկրի հարավ-արեւմուտքում եւ հյուսիս-արեւելքում: Լա Մանշում քամին տեղ-տեղ հասնում է 130 կմ/ժ-ի: Փոթորիկը կգրանցվի գրեթե ամբողջ ատլանտյան ափին եւ կհասնի մինչեւ Փարիզի շրջան:
