Նիկոլ Փաշինյանը դատապարտվել է զանգվածային անկարգությունների կազմակերպման համար, այդ հոդվածը մինչև հիմա նրա վրա է. Սեյրան Օհանյան
Վարչապետն այստեղ անելիք չունի, այդտեղ անելիքը դատական իշխանության հարության մեջ է: Այս մասին լրագրողների հետ զրույցում հայտարարել է Սեյրան Օհանյանը՝ արձագանքելով Նիկոլ Փաշինյանի հայտարարությանը, ով ասել էր, որ կկարդան ՍԴ-ի որոշումը, կհասկանան, թե ինչ պետք է անեն:
Ինչ վերաբերում է հարցին, թե ով է ամեն դեպքում Մարտի 1-ի ողբերգության մեղավորը, պատասխանատուն, Օհանյանը նախ խոսել է անմեղության կանխավարկածի մասին, հետո հավելել, որ բոլոր տեսանյութերում երևում է, թե ով է հրահրել, ով է բախման կոչ արել, ում հոգին էր լուսավորվում, երբ ոստիկանների ձեռքից ոստիկանական պարագաներ էին վերցնում, ինչպես նաև, թե ով էր փոքր տեղային հարձակումներ իրականացնում ոստիկանական զորքերի վրա:
Օհանյանը նշեց, որ դատական համակարգը պետք է պարզի, թե ովքեր են մեղավորը սպանություններում. «Արդեն քանի տարի է այս գործընթացն ընթանում է, մեկ անգամ չէ, որ ես ասել եմ, որ Սահմանադրական կարգի տապալման համար տուժող կողմ չեն կարող հանդիսանալ այն անձինք, ովքեր կորցրել են իրենց հարազատներին: Հոդվածներն այլ են»:
Հարցին՝ համարում է արդյո՞ք Նիկոլ Փաշինյանին մեղավոր, Օհանյանը նշեց, որ վարչապետի աթոռին սոսնձված անձը դատապարտվել է ու իր իշխանության ժամանակ այդ հոդվածը չի հերքվել. «Նա դատապարտվել է զանգվածային անկարգությունների կազմակերպման համար ու այդ հոդվածը մինչև հիմա էլ մնում է իր վրա: Իսկ այս ամենը արդյունք է զանգվածային անկարգությունների»:
