Փաշինյանը հանձնարարեց «կտրուկ ու հատուկ գործողություններով» լուծել Սյունիքի դեպքերի «մեղավորներին» պատժելու հարցը
ՔաղաքականությունՍյունիքի մարզում այսօր՝ ապրիլի 21-ին, տեղի ունեցած դեպքերի առնչությամբ հարուցվել է քրեական գործ՝ ՀՀ ՔՕ 258-րդ հոդվածի 3-րդ մասի (խուլիգանության) հատկանիշներով։ Այս մասին Սյունիքի մարզպետարանում տեղի ունեցած խորհրդակցության ժամանակ վարչապետ Նիկոլ Փաշինյանին զեկուցեց դատախազ Էդուարդ Հարությունյանը։
Նա նշեց, որ քրեական գործը ոստիկանությունից պետք է ուղարկվի Քննչական կոմիտե։
Խորհրադակցությանը ներկա էին նաև Երևանից այսօր շտապ Սյունիք մեկնած՝ ԱԱԾ տնօրեն Արմեն Աբազյանը և Ոստիկանապետ Վահե Ղազարյանը։ Փաշինյանը նրանց հրահանգեց կտրուկ միջոցներով պատժել Մեղրիում, իր խոսքով, միջադեպի մեղավորներին։
«Ուզում եմ անդրադառնալ նաև այսօր Մեղրիում տեղի ունեցած միջադեպին։ Հստակ է, որ տեղի է ունեցել օրենքի խախտում։ Ես ակնկալում եմ, որ Հանրապետության իրավապահ մարմինները շատ հստակ և կոշտ կերպով կարձագանքեն, որովհետև չի կարելի թույլ տալ, որ մարդկանց փոքր խմբակ ուղղակի ստեղծի տպավորություն, այսինքն՝ անկախ տպավորությունից չի կարելի թույլ տալ, որ անպատժելիության մթնոլորտ գոյություն ունենա ՀՀ-ում։ Պարոն Աբազյան, պարոն Ղազարյան, դուք հիմա այստեղ եք, ես ակնկալում եմ, որ շատ կտրուկ և հատուկ գործողություններով այս հարցը կլուծվի և մեղավորները հանրության համար տեսանելի ձևով կկանչվեն պատասխանատվության»,– ասաց նա։
Հիշեցնենք, որ խիստ գաղտնի պայմաններում նախօրեին Սյունիքի մարզ մեկնած Նիկոլ Փաշինյանին այսօր մարզի տարբեր քաղաքներում բնակիչները դիմավորել են հայհոյանքներով եւ վիրավորանքերով։ Սյունեցիները պահանջել են՝ հեռանալ մարզից։
Քաջարանցիները փակել էին քաղաք մտնող ճանապարհը, այդպիսով Փաշինյանն ընդհանրապես չկարողացավ Քաջարան մտնել։
Նշենք, որ Փաշինյանի հետ մարզ են գնացել մեծ թվով ոստիկաններ, ԱԱԾ-ի «Ալֆա» ջոկատը եւ անվտանգության մեծ թվով աշխատակիցներ։
Նշենք, որ Փաշինյանը փողոցներով քայլում է մեծ թվով անվտանգության աշխատակիցների ուղեկցությամբ։
Ավելին...
