«Հրապարակ»․ Արարատ Միրզոյանը դեսպան կնշանակվի․ ում է տեսնում Փաշինյանը ԱԺ նախագահի պաշտոնում, եթե վերընտրվեն
Մամուլ
«Թեև իշխանության նախընտրական ցուցակն էական փոփոխություններ չի կրել 2018 թ․ համեմատ, սակայն եթե ՔՊ-ն վերարտադրվի, պաշտոնները բաշխելիս կտրուկ փոփոխություններ կլինեն։ Օրինակ, չնայած Արարատ Միրզոյանը ցուցակում երկրորդն է, սակայն Փաշինյանը հակված չէ նրան նորից ԱԺ նախագահ դարձնել, կարծում է, որ նա պասիվ է եղել և վարչապետի ու թիմի շահերը չի պաշտպանել։ Միրզոյանը կարող է որևէ երկրում դեսպան նշանակվել։ Նույն դժգոհությունները կան նաև Տիգրան Ավինյանից։ Վերջիններս ոչ միայն թիմի կողքին չեն եղել դժվար պահերին, այլև «խաղեր են տվել» ընդդիմության հետ։
ԱԺ նախագահի պաշտոնը, ըստ որոշ տեղեկությունների, կարող է բաժին հասնել Սուրեն Պապիկյանին, ով ոչնչով չի գերազանցում մյուսներին, բայց կարողացել է աշխատող, լուրջ մարդու իմիջ ձևավորել, որը, ըստ ամենայնի, կփլվի նրա՝ ԱԺ նախագահ դառնալուց մի քանի օր անց։ Իսկ առաջիկա խորհրդարանը շատ ավելի բարդ կազմ է ունենալու, և Պապիկյանը դժվար թե այդ աշխատանքից գլուխ հանի։ Ինչ վերաբերում է ցուցակ մտած բիզնեսմեններին, ապա նրանց գործադիրում պաշտոններն են հետաքրքրում, և ընտրություններից հետո նրանք կհայտնվեն կառավարությունում, իսկ Խաչատուր Սուքիասյանը, հավանաբար՝ Երևանի քաղաքապետի աթոռին։
ՔՊ ցուցակի անակնկալներից են նաև գեներալ Գագիկ Մելքոնյանը, դերասան Գնել Սանոսյանը, մի քանի կուսակցություններ փոխած Վիգեն Խաչատրյանը, նախկին ԲՀԿ-ական Սերգեյ Բագրատյանը, ինչպես նաև նախկին նախարար Հակոբ Արշակյանը, ով հեռացվեց լրագրողին ծեծելու պատճառով, և Վայոց Ձորի նախկին մարզպետ, ՔՊ աշխատակազմի ղեկավար Տրդատ Սարգսյանը, որը փոխգնդապետի հայտնի ծեծից հետո ազատվեց պաշտոնից։ Գործող պատգամավորներից ցուցակ չեն ընդգրկվել ԱԺ խոսնակի հովանավորյալ Աննա Կարապետյանը, Նիկոլայ Բաղդասարյանը, Արտակ Մանուկյանը և այլք»,-գրում է թերթը։
Նյութն ամբողջությամբ կարդացեք թերթի այսօրվա համարում։
