Վլադիմիր Կարապետյանը հավատարմագրերն է հանձնել Ուկրաինայի ԱԳՆ ղեկավարությանը
Քաղաքականություն
Ուկրաինայում Հայաստանի Հանրապետության նորանշանակ դեսպան Վլադիմիր Կարապետյանը հուլիսի 1-ին հանդիպում է ունեցել Ուկրաինայի արտաքին գործերի նախարարության ղեկավարության հետ՝ հավատարմագրերի պատճենի հանձնման կապակցությամբ։ Այդ մասին հաղորդում է Ուկրաինայում Հայաստանի դեսպանությունը:
«Նախ դեսպան Կարապետյանը հավատարմագրերի պատճենը հանձնեց Ուկրաինայի արտաքին գործերի նախարարի տեղակալ Վասիլ Բոդնարին։ Արարողակարգային շփումից հետո տեղի ունեցավ հանգամանալից քննարկում հայ-ուկրաինական երկկողմ հարաբերություններին վերաբերող համատեղ հետաքրքրություն ներկայացնող մի շարք հարցերի շուրջ։
Կողմերն արտահայտեցին իրենց հաստատակամությունը կազմակերպելու հնարավորինս արդյունավետ համագործակցություն՝ արդի օրակարգի պայմաններում երկու երկրների հարաբերությունների խորացման ուղղությամբ։
Ապա տեղի ունեցավ դեսպան Վ․Կարապետյանի հանդիպումը Ուկրաինայի արտաքին գործերի նախարար Դմիտրո Կուլեբայի հետ։ Ողջունելով նորանշանակ դեսպանին, նախարարը պատրաստակամություն հայտնեց նպաստել Հայաստանի հետ հարաբերությունների զարգացմանը բոլոր ոլորտներում։ Նախարարը շնորհավորեց խորհրդարանական ընտրություններին Քաղաքացիական պայմանագիր կուսակցության համոզիչ հաղթանակի կապակցությամբ և վստահություն հայտնեց, որ Հայաստանը կշարունակի ժողովրդավարական բարեփոխումները»,-ասված է հաղորդագրության մեջ։
