«Այս ընդդիմությունը շատ ավելի արմատական է լինելու». «Փաստ»
Մամուլ
«Փաստ» օրաթերթը գրում է
Երեկ Սահմանադրական դատարանն սկսեց քննել չորս քաղաքական ուժերի դիմումը՝ կապված արտահերթ խորհրդարանական ընտրությունների արդյունքներն անվավեր ճանաչելու պահանջի հետ: Քաղտեխնոլոգ Կարեն Քոչարյանը ՍԴ-ի դերը դիտարկում է բացառապես իրավական հարթության մեջ:
«Եթե ՍԴ-ն որոշի, որ խախտումներ եղել են, ապա, բնականաբար, կարող է նաև նոր ընտրություն նշանակվել: Դա արդեն քաղաքական գործընթաց է՝ բայց ելնելով որոշումից և ոչ թե նրանից, որ ՍԴ-ն ինքն է դա անում: Իսկ եթե դիմումը չի բավարարվում, ունենում ենք այն պատկերը, ինչն ունենում ենք: Այսինքն, ՔՊ-ն կստանա 71 մանդատ, «Հայաստան» դաշինքը՝ 29, «Պատիվ ունեմ» դաշինքը՝ 7։
Ինչ վերաբերում է այս պատկերով խորհրդարանի դեպքում ընդդիմության ունեցած հնարավորություններին ու լծակներին, ապա դրանք նախորդ խորհրդարանից ավելի շատ են: Ընդհանուր առմամբ, իհարկե, լծակները շատ չեն, բայց ընդդիմության համար, ամեն դեպքում, ԱԺ-ն հարթակ է, նաև լծակներ, որոնք, ըստ իս, պետք է օգտագործել քաղաքական հետագա պայքարի մեջ: Եվ արդեն ուժերի խնդիրն է, թե ինչպես կօգտագործեն իրենց հնարավորությունները: Նախ՝ արդեն իշխանությունը 2/3 չունի, ինչը նշանակում է, որ սահմանադրական օրենքների փոփոխություն չի կարող անել: Երկրորդ, այնուամենայնիվ, զուտ նաև փորձառության առումով այս ընդդիմությունը շատ ավելի արմատական է լինելու, քան նախորդ խորհրդարանի ընդդիմությունը»,-«Փաստի» հետ զրույցում ասաց քաղտեխնոլոգը՝ շեշտելով այս ընդդիմության ունեցած ավելի արմատական բնույթի մասին:
Նրա խոսքով, այնուամենայնիվ, այս խորհրդարանը ևս կարճ կյանք է ունենալու: «Կարծում եմ՝ մենք կրկին արտահերթ ընտրություններ ենք ունենալու: Իհարկե, չեմ կարող ասել՝ ինչպես, բայց այն կարծիքին եմ, որ այս խորհրդարանը ևս մինչև վերջ չի աշխատելու»,-ասաց նա՝ ընդգծելով, որ նման կերպ մտածելու հիմքերից մեկն այս իշխանությունների կառավարչական հնարավորություններն են:
Ինչ վերաբերում է ընտրություններից հետո ունեցած իշխանության դիրքերին, Կարեն Քոչարյանը նշեց. «Այնպես չէ, որ ուժեղացել է, որովհետև մի բան է, երբ դու ստանում ես 70ից ավելի տոկոս, մեկ այլ բան, երբ ստանում ես 53 տոկոս: Մի բան է, երբ երկրի ազգաբնակչության էյֆորիայի ֆոնին ես գալիս իշխանության, մեկ այլ բան, երբ պարտությունից հետո ես գալիս իշխանության: Մի բան է, երբ քեզ շատ-շատերը հավատում են, մեկ այլ բան է, երբ երկրում, անկախ ամեն ինչից, ատելության մթնոլորտ է: Մի բան է, երբ քեզ հետ ուզում են շատ կադրեր աշխատել, մեկ այլ բան, երբ քո հետ արդեն ոչ ոք չի ուզում աշխատել: Այս ամենից ելնելով՝ ես այն կարծիքին եմ, որ այս իշխանությունն, այնուամենայնիվ, երկար կյանք չունի»:
Անդրադառնալով կառավարման համակարգին՝ նա նշեց. «Կառավարման համակարգում արդեն բավականին լուրջ քաոս է: Ես, իհարկե, չեմ ուզում, որ մեր պետությունը կործանվի, և ես կծափահարեմ, որ կարողանան դուրս գալ այս իրավիճակից: Միևնույն ժամանակ, սակայն, չեմ տեսնում, թե ինչ կադրերով են անելու, ումով են անելու ու ինչ ռեսուրսներով»:
Կարեն Քոչարյանը հակված չէ այն կարծիքներին, որ այս փուլում կադրային ջարդ է իրականացվում. «Պարզապես կոնկրետ ինչոր շատ լոկալ խնդիրներ են լուծում: Խոսքը Սյունիքի համայնքապետների մասին է: Գոնե առայժմ ես ուրիշ ջարդ չեմ տեսնում: Այս փուլում իրականացվողը զուտ նախընտրական խոստումների ցուցադրական մեկ-երկու դրվագներ են»: Քաղտեխնոլոգի խոսքով, ընդհանուր առմամբ, արտահերթ խորհրդարանական ընտրություններով մեր երկրում ճգնաժամը չի լուծվել: «Որովհետև ճգնաժամի խնդիրը միայն իշխանություն-ընդդիմություն պայքարը չէր: Ճգնաժամը հասարակության և հենց իշխանության ներսում է: Կառավարման ճգնաժամ, ապատիա և բարոյահոգեբանական ճգնաժամ կա: Այս ճգնաժամից դեռ շատ երկար պետք է դուրս գալ»,-նշեց նա:
Անդրադառնալով որոշակի պասիվ տրամադրվածություններին ու այս փուլում մի շարք հասարակական, քաղաքական շրջանակների կողմից առհասարակ լռելու որոշումներին՝ քաղտեխնոլոգը նկատեց. «Համոզված եմ, որ սա ժամանակավոր բնույթ է կրում: Յուրաքանչյուր ընտրություններից հետո այսպես է լինում, առավել ևս հիմա, երբ բացի ընտրություններից կա նաև տարիներով կուտակված ատելություն, ապատիա, ինչպես նաև պարտության դեպրեսիա: Այդ ամենը կանցնի, բոլորն էլ կխոսեն: Շատերն էլ ասում են՝ գնում ենք, բայց ոչ մի տեղ էլ չեն գնալու: Իհարկե, գնացողներ կլինեն, բայց ամեն ինչ էլ կամաց-կամաց հունի մեջ է ընկնելու, թեպետ դա չի նշանակում, որ ճգնաժամը դրանից հաղթահարվելու է»:
Նրա դիտարկմամբ, ակտիվացում լինելու է, բայց այն պայմանավորված չի լինելու միայն քաղաքական հնարավոր գործընթացներով. «Բոլորս հասկանում ենք, որ նաև որոշակի քաղաքական գործընթացներ էլ են լինելու, և, բնականաբար, ոչ ոք այդ առիթները բաց չի թողնի ակտիվանալու համար: Ընդ որում, ոչ միայն քաղաքական, այլև յուրաքանչյուր գործընթաց դժգոհություն է գեներացնելու: Խոսքը նաև սոցիալական ու տնտեսական խնդիրների մասին է»:
Աննա Բադալյան
Մանրամասները՝ «Փաստ» օրաթերթի այսօրվա համարում
