Իշխանական ֆեյքերը հրահանգով հարձակվել են Արթուր Վանեցյանի վրա
Քաղաքականություն
Իսրայելական տխրահռչակ Pegasus լրտեսական ծրագրով ԱԺ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանին գաղտնալսելու փորձի բացահայտվելուց հետո սոցցանցերում ֆեյքային գրոհ է սկսվել ընդդիմադիր գործչի նկատմամբ։
Ինչպես արդեն տեղեկացրել ենք՝ Ա. Վանեցյանն այսօր Apple ընկերությունից նամակ է ստացել առ այն, որ իր հեռախոսի մեջ, ըստ ամենայնի, տեղադրվել է Pegasus ծրագիրը, ինչից ենթադրվում է, որ նրան փորձել են գաղտնալսել։ Ա. Վանեցյանն անգամ հրապարակել էր ստացված նամակը, որտեղ Apple ընկերությունը նաեւ հեռախոսն անվտանգ պահելու խորհուրդներ է տալիս։
Սկանդալի բացահայտումից հետո սոցցանցերում իրական գրոհ է սկսվել Ա.Վանեցյանի նկատմամբ, որն իրականացվում է այն կեղծ օգտատերերի կողմից, որոնք օգտագործվում են պրոիշխանական քարոզչություն իրականացնելու համար։ Այլ խոսքով իշխանական ֆեյքերին հրահանգվել է հրապարակավ արշավ սկսել ընդդիմադիր գործչի նկատմամբ։
Արձանագրենք, որ իշխանությունները 7 մլն դոլար են ծախսել ներքաղաքական կյանքում տարբեր գործիչների գաղտնալսելու նպատակով Pegasus լրտեսական ծրագիրը ձեռք բերելու վրա ու սա այն դեպքում, երբ երկրի սահմանները մնացել են առանց ինժեներաշինարարական աշխատանքների, իսկ զինվորները հայտնվել հակառակորդի՝ բաց թիրախում։
