Բավարիան դիտարկում է Լևանդովսկուն վաճառելու տարբերակը․ հարձակվողը դեմ չէ

«Բավարիան» դիտարկում է հարձակվող Ռոբերտ Լևանդովսկուն ամառային տրանսֆերային պատուհանի ժամանակ վաճառելու տարբերակը, հայտնում է Bild-ը։

Մյունխենյան ակումբի ղեկավարությունը Դորտմունդի «Բորուսիայից» Էրլինգ Հոլանդին ձեռք բերելու ծրագրեր է մշակում, իսկ դրա համար պահանջվում է մոտ 75 միլիոն եվրո։ «Բավարիայում» կարծում են, որ կկարողանան վաճառել 33-ամյա լեհ հարձակվողին մոտ 60 մլն եվրոյով, և այդ գումարը կծախսվի 21-ամյա նորվեգացու գնման վրա։

Լևանդովսկու պայմանագիրը Մյունխենի «Բավարիայի» հետ ավարտվում է 2023 թվականի ամռանը։ Եթե գալիք գարնանը խաղացողը պայմանագրի երկարաձգման շահավետ առաջարկ չստանա մյունխենցիներից, ապա ինքը՝ Ռոբերտը, նույնպես դեմ չի լինի տրանսֆերին։ Լևանդովսկու տեսանկյունից «Ոսկե գնդակը» ստանալու նրա շանսերը կմեծանան, եթե նա հանդես գա Պրեմիեր լիգայում կամ ՊՍԺ-ում։

2021/22 մրցաշրջանում Լևանդովսկին Մյունխենի «Բավարիայի» կազմում բոլոր մրցաշարերում անցկացրել է 24 հանդիպում և դարձել 29 գոլի հեղինակ։ Հոլանդը «Բորուսիայի» կազմում անցկացրել է 14 հանդիպում և խփել է 17 գոլ։