«Սեփական ժողովրդի անվտանգությունն անհնար է գնել այլ ժողովուրդների արյան գնով»․ Գարի Կասպարով
Քաղաքականություն
«Ռուսաստանը օկուպացնում է Ղազախստանը»,- Obozrevatel բլոգում գրել է Շախմատի հայ-հրեական ծագումով աշխարհի 13-րդ չեմպիոն, «Մարդու իրավունքների պաշտպանության հիմնադրամի ղեկավար», ծնունդով բաքվեցի Գարի Կասպարովը։
«Ղազախստանի ողբերգական իրադարձությունները շարունակում են զարգանալ. արդեն տեղեկություններ են ստացվել ցուցարարների շրջանում հարյուրավոր սպանվածների մասին։ Հունվարի 6-ից սկսվել է այսպես կոչված՝ ՀԱՊԿ ուժերի կողմից երկրի փաստացի օկուպացիան, ինչը, իրականում, նշանակում է Ղազախստանի ինքնիշխանության մի մասի փոխանցում Կրեմլին։ Այս ֆոնին ամոթալի է Հայաստանի առաջնորդ Նիկոլ Փաշինյանի պահվածքը, ով ակտիվորեն մասնակցել է ռուս բռնապետի՝ Ղազախստանը գրավելու ծրագրի իրականացմանը՝ դրանով իսկ մեղսակից դառնալով այսօրվա ջարդերին։ Նրա գործողությունները հատկապես ցինիկ են դարձնում այն փաստը, որ Փաշինյանը իշխանության եկավ խաղաղ հեղափոխության արդյունքում։ Սեփական ժողովրդի անվտանգությունը անհնար է գնել այլ ազգերի արյան գնով»,- գրել է Կասպարովը։
«Տարիներ շարունակ արևմտյան «պրագմատիկ-քաղաքական գործիչներից» մենք պատմություններ ենք լսել կայուն նազարբաևյան Ղազախստանի մասին։ Այնուամենայնիվ, չմոռանանք, որ Նազարբաևի «լուսավոր բռնապետության» հերոսացումը հաճախ նյութական ամուր հիմքեր է ունեցել։ Այսօր, դիտելով ցուցարարների գնդակահարության կադրերը, մենք ևս մեկ անգամ տեսնում ենք այն փաստի հաստատումը, որ իրենց էությամբ բոլոր բռնապետությունները նույնն են. եթե կա իշխանությունը կորցնելու վտանգ, ապա բռնապետերը պատրաստ են բոլոր հնարավոր միջոցներով բնաջնջել իրենց համաքաղաքացիներին»,-գրել է հոդվածագիրը։
