Ռուսական ուժերը հրթիռային հարվածներ են հասցրել Լվովի մարզում գտնվող ռազմաբազային
ՄիջազգայինԱյսօր վաղ առավոտյան ռուսական ուժերը հրթիռային հարվածներ են հասցրել Լվովի մարզում՝ Լեհաստանի սահմանին մոտ գտնվող ռազմաբազային։
Լվովի մարզային ռազմական ղեկավարության հայտարարության համաձայն՝ Յավորովի Խաղաղարության և անվտանգության միջազգային կենտրոնի տարածքի վրա, նախնական տվյալներով, արձակվել է 8 հրթիռ: Զոհվել է 9 զինծառայող, 57 մարդ վիրավորվել է, ուկրաինական UNIAN լրատվական գործակալության փոխանցմամբ՝ հայտարարել է ռազմական վարչակազմի ղեկավար Մաքսիմ Կոզիցկին։
Ռազմաբազան 360 քառակուսի կիլոմետր տարածք է զբաղեցնում և Լեհաստանի սահմանից հեռու է ընդամենը շուրջ 25 կիլոմետր, խոշորագույնն է Ուկրաինայի արևմուտքում։ Այստեղ Ուկրաինան անցկացնում է ՆԱՏՕ-ի հետ համատեղ զորավարժությունների մեծ մասը։
Կոզիցկին հայտնել է նաև, որ ըստ նախնական տվյալների՝ հրթիռներն արձակվել են Ռուսաստանի տարածքից։
Նույնպես Ուկրաինայի արևմուտքում, ռուսական զինուժը օդային հարվածներ է հասցրել Իվանո-Ֆրանկովսկի օդանավակայանին։
Լվովի մարզում հասցրած հարվածներով ռուսաստանցիները ցանկանում են ապացուցել, որ Ուկրաինայում չկա ոչ մի հանգիստ ու անվտանգ կետ, հայտարարել է Ուկրաինայի ներքին գործերի նախարարի խորհրդական Վադիմ Դենիսենկոն։
Փետրվարի 24-ին Ռուսաստանի սկսած ռազմական գործողությունները հիմնականում ծավալվում են Ուկրաինայի արևելքում և մասնավորապես հարավ-արևելքում։
