«Հայաստանի գործող իշխանությունը չի զբաղվում Հայաստանի շահերի առաջ մղմամբ նույնիսկ այն կառույցներում, որտեղ Հայաստանը լիիրավ անդամ է». Հակոբյան

NEWS.am-ի հարցազրույցը «Հայաստան» խմբակցության պատգամավոր, Վերածնվող Հայաստան կուսակցության ղեկավար Վահե Հակոբյանի հետ:

«Հայաստան» խմբակցությունը վերականգնել է իր մասնակցությունը միջազգային խորհրդարանական կազմակերպությունների գործունեությանը: Երևանում տեղի ունեցավ ԵՎՐԱՆԵՍԹ ԽՎ նիստ, որին նաև ադրբեջանական պատվիրակությունն էր մասնակցում և որի ընթացքում հակառուսական հայտարարություն ընդունվեց, տեղի ունեցավ ԵՄ-Հայաստան խորհրդարանական գործընկերության կոմիտեի նիստը: Ի՞նչ ազդակներ եք ստանում Եվրամիությունից և արդյո՞ք Հայաստանին հուզող հարցերն ու դիրքորոշումները տեղ գտնում են այս կառույցների օրակարգերում: Մասամբ ավելի վաղ անդրադարձաք այս հարցին, բայց խոսենք մանրամասների մասին:

ԵՎՐԱՆԵՍԹ ԽՎ հանձնաժողովների նիստերի անցկացումը Երևանում այդ օրակարգերով հերթական ապացույցն էր, որ Հայաստանի գործող իշխանությունը չի զբաղվում Հայաստանի շահերի առաջ մղմամբ նույնիսկ այն կառույցներում, որտեղ Հայաստանը լիիրավ անդամ է:

Երևանում անցկացվող նիստի ժամանակ մեզ, մեր օրակարգին, մեր տարածաշրջանին առնվող անվտանգային խնդիրների բարձրաձայնումը մնաց ելույթների տեսքով և այդ թեմայով կառույցը դիրքորոշում չարտահայտեց, հայտարարություն չընդունվեց: Փոխարենը, օրակարգում ներառված էր հակառուսական թեմայով քննարկում, որի արդյունքներով ընդունվեց հակառուսական հայտարարություն:

Հայաստանի պատվիրակության ղեկավարը, ով ընդգրկված է կառույցի Բյուրոյի կազմում ոչ միայն չի հասել ի նպաստ ՀՀ և Արցախի ազգային և պետական շահերի որևէ հայտարարության, այլ չի կարողանում նույնիսկ բացատրել, թե ինչ դիրքորոշում է զբաղեցրել Ռուսաստանի դեմ ուղղված հայտարարության ընդունման ժամանակ և ինչու առնվազն չի փորձելօգտվել վետոյի իրավունքից: Հայկական կողմը նույնիսկ պաշտոնական հայտարարություն չարեց այդ մասին, չպարզաբանեց իր կեցվածքը:

Բացի այդ, կառույցի կողմից քննարկվող բանաձերի նախագծերից ոչ մեկը չի անդրադառնում Հայաստանին հուզող, Հայաստանի համար առաջնային խնդիրներին: Բնական է, որ Ազգային Ժողովի ընդդիմադիր խմբակցություններից պատվիրակները նիստի ժամանակ բարձրաձայնեցին այս հարցերը և հետագայում էլ ջանքեր գործադրելու են բանաձևերի նախագծերում փոփոխությունների հասնելու համար: Բայց առկա տրամադրությունների և ընկալումների պարագայում, երբ պատվիրակության ղեկավարությունը լրիվ այլ քաղաքական գիծ է որդեգրել, բնական է, որ այդ ջանքերի արդյունավետությունը մեծ լինել չի կարող:

Ուշագրավ է, որ սրան զուգահեռ Եվրամիություն-Հայաստան խորհրդարանական գործընկերության կոմիտեի Երևանում կայացած նիստի արդյունքներով համանախագահների ընդունած հայտարարությունն արտահայտում է Հայաստանի համար օրակարգային խնդիրները, բայց այստեղ էլ առնչվում ենք մեկ այլ խնդրի: Ակնհայտ է, որ եվրոպական կողմը ներառել է փաստաթղթում հայկական կողմի բարձրաձայնած բոլոր հարցերն ու խնդիրները, սակայն փաստաթղթում չկա անդրադարձ Հայոց ցեղասպանության ճանաչման խնդրին, մինչդեռ օրինակ 2017թ-ին հստակ եղել է կոչ ԵՄ անդամ երկրներին՝ ճանաչելու Հայոց Ցեղասպանությունը, անդրադարձ է եղել միակողմանիորեն փակ սահմանին և 2009թ-ի հաշտեցման հայկական նախաձեռնությունը Թուրքիայի տապալելուն: Սա հերթական ապացույցն է, որ Հայաստանի գործող իշխանությունը լուռ կատարում է թուրքական կողմի նախապայմանները, այդ թվում՝ օրակարգից հանելով Հայոց ցեղասպանության ճանաչման հարցը: