Ազգային ժողովը գլխավոր դատախազ է ընտրում
Քաղաքականություն
Հայաստանի Ազգային ժողովն այսօր ընտրում է նոր Գլխավոր դատախազ։ Խորհրդարանը միայն երեկ էր ավարտել արտահերթ նիստը, որի ընթացքում Վճռաբեկ դատարանի երկու պալատների նոր դատավորներ ընտրեց։ Մինչև այսօր տեղեկություն չկա նոր արտահերթի մասին, միայն առավոտյան Ազգային ժողովի խորհուրդը հապշտապ նիստ է գումարել, որոշում է կայացրել արտահերթ նիստն անցկացնել հենց այսօր։
Նիկոլ Փաշինյանը շտապում է, ցանկանում է իր օգնական Աննա Վարդապետյանին նշանակել Գլխավոր դատախազի պաշտոնում։ Դրանից հետո նաև կազատվի նրա ձեռքերը գործող գլխավոր դատախազ Արթուր Դավթյանին ինչ-որ մի տեղ տեղավորելու համար։ Թեև Փաշինյանն առանձնապես խանդավառված չէ Արթուր Դավթյանի գործունեությամբ Գլխավոր դատախազի պաշտոնում, հրաշալի հասկանում է, որ Արթուր Դավթյանը ամբողջությամբ գտնվում է իր վերահսկողության տակ և չի կարողանա այլ սեպարատ գործողությունների գնալ։
Այս առումով Դավթյանի թեկնածությունը իդեալական է համարվում հենց Բարձրագույն խորհրդի նախագահի պաշտոնում։ Ի պաշտոնե լինելով Գլխավոր դատախազ՝ նա շփվել է դատավորների հետ, հրաշալի գիտի նրանց գործունեությունը և կարող է բավական արդյունավետ վերահսկողություն իրականացնել, ի տարբերություն Գագիկ Ջհանգիրյանի, ով գտնվում է իշխանական օլիգարխ Խաչատուր Սուքիասյանի վերահսկողության տակ և ցանկացած պահի կարող է տհաճ անակնկալներ մատուցել Նիկոլ Փաշինյանին։ Հենց սա է ամբողջ խնդիրը, որ Փաշինյանը ցանկանում է փոխել Ջհանգիրյանին։
Ի դեպ Ջհանգիրյանը օրերս Ռուբեն Վարդազարյանին ԲԴԽ նախագահի պաշտոնից ընդհանրապես հեռացնելուց հետո, մտադիր էր հենց նույն օրը կամ հաջորդ օրը ԲԴԽ նիստ գումարել, առաջադրել իր թեկնածությունը և պարտադրել, որ իրեն ընտրեն, որպեսզի կարողանան Նիկոլ Փաշինյանին զրկել խուսանավելու հնարավորությունից, սակայն ԲԴԽ անդամներին կտրուկ զգուշացրել է առայժմ ձեռնպահ մնալ գործողություններից՝ կապված աղմկահարույց ձայնագրությունների հետ, մինչև որ այդ ձայնագրության քննության ավարտը։
Փաշինյանը նաև դժգոհ է Ջհանգիրյանի գործողություններից, որ նա տորպեդահարում է Արդարադատության նախարար, Փաշինյանի սիրելի Կարեն Անդրեասյանի գործունեությունը, մի շարք դատավորների կարգապահական վարույթների հարցում:
