Զալցբուրգ ՝ «ՀՈԳԵՎՈՐ ՆԱԽԵՐԳԱՆՔ»
Մշակույթ
Մոցարտի ծննդավայր Զալցբուրգի հռչակավոր փառատոնի վերնագրին այս տարի հավելվեց «Հոգևոր նախերգանք» խորագիրը։
Եվ բնական է, որ «Գեղարդ» երգեցիկ խումբը (Գեղարվեստական ղեկավար՝ Մհեր Նավոյան, խմբավար և մեներգչուհի՝ Անահիտ Պապայան) կրկին հրավիրվել էր Ավստրիա։
«Գեղարդի» ելույթը տեղի ունեցավ հուլիսի 21-ին։ Ծրագիրը բաղկացած էր Կոմիտասի Պատարագի հատվածներից, Մ. Մաշտոցի, Հ. Օձնեցու, Գ. Նարեկացու, Ն. Շնորհալու ստեղծագործություններից։
Համերգին հնչեցին նաև ժամանակակից հայ կոմպոզիտորների խմբերգերը և խմբերգային մշակումները՝ Էդուարդ Հայրապետյանի «Հայր մեր»-ը, Դավիթ Հալաջյանի խմբերգը՝ ըստ 50-րդ սաղմոսի, Երվանդ Երկանյանի՝ ըստ Հ. Սանահնեցու,Վաչե Շարաֆյանի՝ ըստ Մ. Մաշտոցի և այլն։
Ի դեպ, հիշյալ փառատոնում «Գեղարդը» առաջին անգամ կատարեց Անհայտ հեղինակի «Վարանիմ ի մեղաց» տաղը՝ Դանիել Երաժշտի խմբերգային մշակմամբ։
Այն նվիրված է երգչախմբին և զարդարում է Դանիել Երաժշտի՝ «Գեղարդի լույսը» անունը կրող խմբերգերի ժողովածուն, որը վերջերս հրատարակել է «Նարեկացի» արվեստի միությունը։
Եվ «Գեղարդի» լույսը սփռվում է ոչ միայն մեր սրտերում, այլև Հայաստանից դուրս։
