Սպասում էին, որ պետնախարարը ձախողվի, բայց սխալվեցին իրենց հաշվարկներում

Արցախի պետնախարար Ռուբեն Վարդանյանի գործողությունները, ճգնաժամային կառավարման նրա հմտությունները և բացասական երևույթները կանխելուն միտված ջանքերը որոշակի մտահոգություններ են առաջացրել հայաստանյան և Արցախի որոշ քաղաքական շրջանակների մոտ։

Տպավորություն է, թե այդ շրջանակները ցանկանում են, որ պետնախարարը ձախողվի իր աշխատանքում, որպեսզի կարողանան քննադատությունների թիրախը ուղղել նրա ուղղությամբ։ Նույն շրջանակները խիստ մտահոգված են, որ Վարդանյանը ոչ միայն պետնախարար է նշանակվել, այլև ավելի ու ավելի շատ լիազորություններ է ձեռքբերում, խանգարում բյուջեն վատնելու, տարատեսակ արտոնություններից օգտվելու ցանկություններին։

Պետնախարարն ու իր թիմը, թերևս, արդյունավետ աշխատում են՝ հնարավորություն չտալով չարակամներին։ Տարօրինակ կերպով մի շարք քաղաքական գործիչներ, որոնց ձայնը պետք է այս օրերին ավելի լսելի լիներ, ընդհանրապես ծպտուն չեն հանում։ Եթե երրորդ նախագահ Սերժ Սարգսյանը հանրահավաք կազմակերպեց Հայաստանի կառավարության առջև , ինքն էլ անձամբ մասնակցեց դրան, ապա Հայաստանի երկրորդ նախագահ Ռոբերտ Քոչարյանն անհետացել է հրապարակային դաշտից, 8 օրվա ընթացքում գեթ մեկ բառ նույնիսկ չի արտահայտվել, ընդամենը մեկ-երկու հայտարարություն է տարածել նրա ղեկավարած «Հայաստան» դաշինքը։

Ռոբերտ Քոչարյանի և Երևանի քաղաքապետի պաշտոնին հավակնող Լևոն Քոչարյանի կողմից որևէ հայտարարություն, գործողություն այդպես էլ չի նշմարվել։ Գրեթե նույն վիճակում է Արցախի անվտանգության խորհրդի քարտուղար Վիտալի Բալասանյանը, մարդ, ով ի պաշտոնե պարտավոր է առաջինն արձագանքելու և բոլոր ջանքերը գործադրելու Լաչինի միջանցքը բացելու ուղղությամբ։ Ութ օրվա ընթացքում Բալասանյանին միայն մի քանի անգամ տեսել են Արցախի նախագահի մոտ տեղի ունեցած խորհրդակցություններին նստած։

Փաստն այն է, որ Լաչինի միջանցքի բացման ուղղությամբ հիմնական ջանքերն իրականացվում են պետնախարար Ռուբեն Վարդանյանի կողմից, ով անձամբ և իր թիմի հետ միասին կրում է պատասխանատվության ամբողջ բեռը։ Իսկ այս ճգնաժամի լուծումից հետո այլևս հնարավոր կլինի քաղաքական առումով արձանագրել մի շարք ուժերի և գործիչների սնանկությունը։

Լինա Արամյան