Արցախում ներքաղաքական ճգնաժամը հաջողվել է կասեցնել
Քաղաքականություն
Արցախում ներքաղաքական ճգնաժամ չկա. երեկ Ազգային ժողովի պատգամավորների հետ հանդիպմանը վստահեցրել է նախագահ Արայիկ Հարությունյանը։
Հիշեցնենք, վերջին օրերին տեղեկություններ էին շրջանառվում, թե Արայիկ Հարությունյանը մտադիր է պետնախարարի պաշտոնից ազատել Ռուբեն Վարդանյանին և նրա փոխարեն նշանակել ներքին գործերի նախարար Կարեն Սարգսյանին։
Ինքը՝ Ռուբեն Վարդանյանը, հայտարարել էր, թե հրաժարական չի տալու և նաև անթույլատրելի էր համարել ադրբեջանական նարատիվների տարածումը և երկիրը ցնցումների տանելը։
Նախօրեին անվտանգության խորհրդի նիստ էր կայացել, իսկ երեկ էլ նախագահ Արայիկ Հարությունյանը հանդիպումներ է ունեցել մի շարք քաղաքական ուժերի, ինչպես նաև խորհրդարանական խմբակցությունների հետ, քննարկումներ անցկացրել, ապա և հայտարարել, թե՝ « Չի կարելի թույլ տալ ներքաղաքական ճգնաժամ Արցախում, քանի որ կա հստակ գիտկցում, որ մեր հիմնական օրակարգը ծագած հրատապ խնդիրները հաղթահարելն է ու Արցախն այս իրավիճակից դուրս բերելը», - ասել է նա։
Հարությունյանը նշել է, թե զերծ կմնա եղած շահարկումները մեկնաբանելուց, ընդամենը կարող է հստակ ասել, որ Արցախում ներքաղաքական ն ճգնաժամ չկա և չի կարելի նման բան թույլ տալ։
Ընդսմին, Արցախի նախագահը ակնարկել է, թե ներքաղաքական խնդիրներին կկարողանան վերադառնալ միայն իրավիճակը հանգուցալուծելուց հետո։ Իհարկե, որևէ կասկած չկա թե՛ Արցախի նախագահի այս կցկտուր հայտարարությունների, և թե՛ տարածվող լուրերի ֆոնին, որ Արայիկ Հարությունյանն ամեն ինչ փորձել է անել Արցախի պետնախարար Ռուբեն Վարդանյանից ազատվելու համար։
Նրան այս իրավիճակում փորձում էին օգնել ոչ միայն Հայաստանի և Ադրբեջանի իշխանությունները, այլ նաև Արցախի որոշ ուժային և քաղաքական կառույցներ, մինչդեռ Ռուբեն Վարդանյանի բավականին սուր արձագանքից հետո հասկացավ, որ պետնախարարը չափազանց «պինդ ոսկոր» է իր ատամի համար և առայժմ զերծ է մնում իրավիճակը սրելու գործողություններից, թեպետ չի բացառվում, որ թե՛ Հարությունյանը և թե՛ Նիկոլ Փաշինյանի վարչախումբը փորձեն առաջիկայում սրել իրավիճակը և նոր «օյիններ» փորձեն հանել։ Այդ անձանց պարագայում որևէ բան բացառել անհնար է։
Աննա Նադոյան
