Ինչո՞ւ են հեռացրել Փաշինյանի ամենամոլի կողմնակցին

Օրեր առաջ «Քաղաքացիական պայմանագիր» կուսակցության վարչությունը նիստ էր գումարել և քննարկել կարգապահական բնույթի հարցեր։ Տարածված հաղորդագրության ամենատարօրինակ հատվածն այն էր, որ կուսակցությունը որոշել էր հեռացնել կուսակիցներից մեկին՝ պարբերաբար սոցիալական ցանցերում սկանդալների մեջ հայտնվող ոմն Թաթուլ Ասիլյանի։ Կուսակցությունը որևէ կերպ չի պատճառաբանել, թե ինչու է որոշել «Փաշինյանի արևով երդվող» մի անձի հեռացնել և այդ մասին էլ անգամ հատուկ հաղորդագրություն տարածել։ Որևէ կերպ իր հեռացումը չի մեկնաբանել անգամ նույն այդ Ասիլյանը, ավելին շարունակում է Նիկոլ Փաշինյանի նկարները տարածել սեփական ֆեյսբուքյան էջում։

ՔՊ մեր աղբյուրի փոխանցմամբ՝ կուսակցությունում որոշել են Ասիլյանին հեռացնել ոչ թե արցախցիների մասին նրա լկտի արտահայտությունների, կամ էլ ընդդիմության դեմ կեղտոտ ստատուսներ գրելու, այլ իրականում կոռուպցիոն տարբեր գործարքների մեջ ներքաշված լինելու կասկածի համար։ Աղբյուրի փոխանցմամբ՝ Ասիլյանին ոչ միայն հեռացրել են, այլև տեղեկություններ են փոխանցել իրավապահներին և չի բացառվում, որ առաջիկայում նշված անձին քրեական պատասխանատվության ենթարկելու որոշում կայացվի։ Առայժմ հստակ որոշում չկա, սակայն ՔՊ-ում վստահ են, որ տեղեկատվությունը երկար պահել չի հաջողվի և, ի վերջո, հանրությունը կարող է իմանալ, թե ինչով են զբաղվում Նիկոլ Փաշինյանի որոշ ամենամոլեռանդ կուսակիցները, ուստի և որոշել են հենց իրենք նախապես դիմել դատախազություն և տեղեկացնել Ասիլյանի վերաբերյալ իրենց կասկածների մասին։ Իսկ թե ինչո՞վ է աչքի ընկել Ասիլյանը, աղբյուրը չհայտնեց, միայն նշեց, որ խոսքը բավականին լուրջ գումարների մասին է։

Նունե Մանուկյան