Փաշինյանը պարտավորվել է վերադասավորումներ անել ուժային կառույցներում

Հայաստան, ԱՄՆ և Եվրամիություն համաձայնությունը, բացի փաստաթղթերից ու հայտարարություններից, նաև գաղտնի հավելված ունի, որտեղ ավելի շատ մշակված են Հայաստանի պարտավորությունները` Արևմուտքի պահանջները կատարելու առումով։

ՔՊ մեր աղբյուրի փոխանցմամբ՝ Եվրամիությունը պահանջում է պաշտոններից հեռացնել բոլոր այն անձանց, որոնք սերտ կապեր են ունեցել և ունեն Ռուսաստանի հետ։ Խոստանալով առաջիկայում ավելի մեծ գումարներ՝ Եվրամիությունից նշել են, որ այդ գումարները և աջակցությունը կարող են տրամադրել միայն իրենց կողմից վստահելի մարդկանց։

Հատկապես ուժայինների պարագայում, Եվրամիությունը զգալի մտահոգություններ ունի մի շարք պաշտոնյաների մասով, և Փաշինյանի առջև դրվել է նրանցից ազատվելու հարցը։ Բանակում դա առաջին հերթին վերաբերում է ԳՇ պետ Էդվարդ Ասրյանին։ Եվրամիությունը նաև խնդիրներ է տեսնում ԱԱԾ տնօրեն Արմեն Աբազյանի և հատկապես` ներքին գործերի նախարար Վահե Ղազարյանի պարագայում։

Եթե ԱԱԾ և ԳՇ պետերի դեպքում Փաշինյանն առանձնապես խնդիր չունի հեռացնելու, Վահե Ղազարյանի փոփոխությունը տեղի կունենա մեկ–երկու շաբաթվա ընթացքում։

Մեր աղբյուրը, մասնավորապես, նշեց, որ Փաշինյանն այս օրերին բուռն հանդիպումներ է ունենում ՔՊ վարչության անդամների հետ, քննարկում տարբեր թեկնածուներ՝ ներքին գործերի նախարարի պաշտոնի համար։ Մասնավորապես` «Քաղաքացիական պայմանագրում» չափազանց կոշտ դեմ են փոխնախարար Արփինե Սարգսյանի թեկնածությանը, թեև վերջինս որոշ կապեր ունի Եվրամիության կառույցների հետ։

ՔՊ վարչությունից հայտարարել են, թե այդ պաշտոնում պետք է քաղաքական դեմք նշանակվի և ցանկալի է հենց ՔՊ վարչության անդամ, որն էլ կկարողանա ավելի լավ վերահսկել կարևորագույն ուժային կառույցը։

Առայժմ այս հարցում կոնսենսուս կա, բայց թե ո՞ւմ կնշանակեն, Փաշինյանն ու ՔՊ վարչությունը դեռ չեն որոշել։

Անահիտ Պողոսյան