Փաշինյանական վարչախմբի և եկեղեցու հարաբերությունները սրվել են
Քաղաքականություն
Գործող վարչախմբի և Հայ առաքելական եկեղեցու հարաբերությունները կրկին սրվել են, ընդ որում` եկեղեցին այլևս չի էլ թաքցնում իր ընդգծված ընդդիմադիր դիրքորոշումները, իսկ անվանի մի շարք հոգևորականներ պարզապես առաջնորդում են փաշինյանական վարչախմբի դեմ պայքարը։
Նախօրեին, Մայր աթոռը հայտարարություններ է տարածել և նշել, թե վերջին շրջանի զարգացումներն այլևս կասկած չեն թողնում, որ Հայաստանի իշխանությունները Արցախի լիակատար հայաթափման և ՀՀ տարածքների բռնազավթման պայմաններում, տեղի տալով Ադրբեջանից հնչող սպառնալիքներին, պատրաստվում են վերջինիս հանձնել Տավուշի մարզից տարածքներ, նախքան ենթադրվող սահմանազատումը և սահմանագծումը։
Գործող վարչախումբը վրդովվել է այս հայտարարության տեքստից, ինչպես նաև Տավուշի թեմի առաջնորդ Տեր Բագրատ Արքեպիսկոպոս Գալստանյանի` քաղաքականությամբ զբաղվելու անհրաժեշտության մասին կոչից։
Նախ, «Քաղպայմանագիր» խմբակցության ղեկավար Արթուր Հովհաննիսյանն էր ազգային ժողովի ամբիոնից մեղադրանքներ հնչեցրել հայ-առաքելական եկեղեցու հասցեին, ապա և ՔՊ փոխնախագահ Վահագն Ալեքսանյանը հայտարարել էր, թե Մայր աթոռի պաշտոնական կայքը վերածվել է «ֆեյք նյուզեր» տարածողի։
Ալեքսանյանին պատասխանել է հենց Տավուշի թեմի առաջնորդը և նշել, որ «ֆեյք նյուզ» տարածողն էլ են իրենք, «ֆեյք կառավարությունն» էլ են իրենք։
Ընդհանրապես «ֆեյք» գոյությունն էլ են իրենք, կեղծիք բառիս բուն իմաստով,- նշել է Տեր Բագրատ Արքեպիսկոպոս Գալստանյանը։
Փաստացի, եկեղեցին առայժմ սահուն քայլերով անցնում է լիակատար ընդդիմադիր դաշտ, չի բացառվում նաև ինչ որ պահի նույնիսկ հայտարարեն Փաշինյանի դեմ բողոքի լայնածավալ ակցիաներ սկսելու իրենց պատրաստակամության մասին։
Հենց դա է, որ մտահոգում և ահաբեկում է Փաշինյանին՝ հասկանալով, որ համահայկական այդ կառույցի դեմ շատ ավելի բարդ է լինելու պայքարել։
Էլիզա Գալստյան
