Արգենտինան չի ճանաչել նախագահական ընտրություններում Մադուրոյի հաղթանակը
ՄիջազգայինՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Արգենտինան չի ճանաչում Վենեսուելայի ընտրությունների արդյունքները, որոնց համաձայն՝ հաղթել է գործող նախագահ Նիկոլաս Մադուրոն։ Այս մասին X սոցիալական ցանցի իր էջում հայտնել է Արգենտինայի նախագահ Խավիեր Միլեյը:
«Վենեսուելացիները որոշել են վերջ դնել Նիկոլաս Մադուրոյի կոմունիստական բռնապետությանը։ Տվյալները փաստում են ընդդիմության ջախջախիչ հաղթանակի մասին, և աշխարհը սպասում է, որ նա ճանաչի պարտությունը տարիներ շարունակ տևած սոցիալիզմից, թշվառությունից, անկումից և մահից հետո: Արգենտինան չի պատրաստվում ճանաչել հերթական խարդախությունը, և հույս ունի, որ զինված ուժերն այս անգամ կպաշտպանեն ժողովրդավարությունը և ժողովրդական կամքը։ Ազատությունը զարգանում է Լատինական Ամերիկայում», - գրել է նա:
Վենեսուելայի գործող նախագահ Նիկոլաս Մադուրոն քվեաթերթիկների 80%-ի հաշվարկից հետո ձայների 51,2%-ով հաղթում նախագահական ընտրություններում: Այս մասին, ինչպես հայտնում է ՌԻԱ Նովոստին, հայտարարել է Վենեսուելայի Ազգային ընտրական խորհրդի նախագահ Էլվիս Ամորոսոն։
«Հայրենասիրական մեծ բևեռից Նիկոլաս Մադուրո Մորոսը ստացել է 5,150,092 ձայն կամ ձայների 51,20%-ը։ Միասնության խորհրդի թեկնածու Էդմունդո Գոնսալեսը ստացել է 4,445,978 ձայն կամ ձայների 44,2%-ը»,- լրագրողներին և դիտորդներին ասել է Ամորոսոն՝ ընդգծելով, որ ընտրությունների մասնակցությունը կազմել է 59%:
Հիշեցնենք, որ Վենեսուելայում երեկ նախագահական ընտրություններ էին: Երկրի գործող նախագահ Նիկոլաս Մադուրոն, որը պաշտոնը ստանձնել է 2013 թվականին Ուգո Չավեսի մահից հետո, առաջադրվում է երրորդ անգամ անընդմեջ։
Մադուրոյի գլխավոր մրցակիցը նախկին դիվանագետ Էդմունդո Գոնսալեսն է։ Նրան աջակցում է ընդդիմադիր կուսակցությունների կոալիցիան:
