Արսենյանը հրաժարվեց մանդատից. Կգնա դեսպան
Քաղաքականություն
ՔՊ-ական պատգամավոր Գուրգեն Արսենյանը դադարեցրել է պատգամավորական լիազորությունները։ Նա դիմում է ներկայացրել` պատգամավորական լիազորությունները դադարեցնելու մասին:
Ըստ ամենայնի, Արսենյանն ամենամոտ ապագայում կնշանակվի դեսպան ՌԴ-ում, նրա ագրեմանը տևական ձգձգումից հետո ստորագրել էին մի քանի ամիս առաջ։ Իսկ ներկայումս գործող դեսպան Վաղարշակ Հարությունյանին պարզապես պաշտոնանկ կանեն և որևէ այլ պաշտոնի չեն նշանակի։ Հարությունյանն անցած ամիս այցելել էր ՌԴ սահմանամերձ Բելգորոդ քաղաք, որտեղ բնակելի շենքերից մեկն ավերվել էր ուկրաինական զինված ուժերի հրթիռային հարվածի հետևանքով։
«Վայր, որտեղ կենտրոնացած է տասնյակ մարդկանց վիշտը: Կարծում եմ, դա հոգեբանական ազդեցություն ունի ամբողջ քաղաքի վրա: Բնականաբար, ցանկություն կա, որ այս ամենն արագ ավարտվի»,- ասել էր նա լրագրողներին։
Դեսպանի այս քայլը անարձագանք չէր մնացել, հատկապես հաստիքային արևմտամետները կոչեր էին հնչեցնում Վաղարշակ Հարությունյանին անհապաղ հետ կանչելու մասին։ Արսենյանից հետո պատգամավորական ցուցակում հաջորդը Արմենուհի Ղազարյանն է, ով մանկապատանեկան արվեստի կենտրոն, համայնքային ոչ առևտրային կազմակերպության ղեկավարի պաշտոնն է զբաղեցնում:
Հասմիկ Արամյան
