Մրցույթն ամփոփվեց. ովքե՞ր արժանացան կրթաթոշակների. «Փաստ»
Մամուլ
«Փաստ» օրաթերթը գրում է.
Հայրենիքի համար անմահացած, պատերազմի բովով անցած, ռազմական գործողությունների ժամանակ տարբեր վիրավորումներ ստացած տղաները պետք է լինեն ոչ միայն պետության, այլ նաև հասարակության ուշադրության ու հոգածության ներքո: Կարևոր է աջակցել նրանց, թույլ չտալ, որ ընկճվեն դժվարություններից, հույս տալ ապագայի նկատմամբ, որում կարող ենք ինչ-որ բան փոխել՝ այսօր արդեն կրթությամբ ու գիտելիքներով զինելով երիտասարդներին: Մեր երկրում անլուծելի թվացող խնդիրներն ու դժվարությունները շատ են, բայց դա թևաթափ լինելու, անելիքը հետաձգելու պատճառ չէ: «ՀայաՔվե» քաղաքացիական նախաձեռնությունը կյանքի կոչեց «Հանուն հայրենիքի նահատակների» կրթաթոշակների մրցույթը, որի արդյունքներն օրերս ամփոփվեցին, պարգևատրվեցին հաղթողներն ու մրցանակակիրները:
Նախաձեռնության անդամները վստահ են՝ կրթված հասարակությունն է ունակ ճիշտ որոշումներ կայացնելու, իր երկրի ապագան տնօրինելու, այդ նույն ապագայում ճակատագրական սխալներից խուսափելու: Կրթաթոշակների այս մրցույթում մասնակցելու համար «ՀայաՔվեն» մի քանի պարտադիր պայման էր առաջադրել: Եվ այսպես՝ անձը մասնակցել է մարտական գործողությունների, որի հետևանքով հաշմանդամություն է ձեռք բերել կամ զոհվել է, նրա ընտանիքի ուսանող անդամները կարող էին դիմել այս կրթաթոշակի համար: Կարող էին դիմել նաև այն ուսանողները, որոնք անձամբ էին մասնակցել հայրենիքի պաշտպանությանը և, ավաղ, ստացած վիրավորումների հետևանքով հաշմանդամություն ձեռք բերել: Պարտադիր պայման է եղել նաև ուսանողների բարձր առաջադիմությունը և հանրային ակտիվությունը՝ հանրօգուտ աշխատանք, բարեգործություն, կամավորություն և այլն:
Այս կրթաթոշակը ստանալու համար «ՀայաՔվեն» ստացել էր 51 դիմում: Բոլոր դիմողները հրավիրվել էին հարցազրույցի, նախքան դա ստեղծվել է հինգ հոգուց կազմված հանձնաժողով, որի կազմում ընդգրկված են եղել նախաձեռնության խորհրդի անդամները և նաև բարձր առաջադիմությամբ, քաղաքականապես ակտիվ մեկ ուսանող: Մրցույթի արդյունքում օրերս 16 ուսանող ստացավ «Հանուն հայրենիքի նահատակների» կրթաթոշակ, իսկ մյուս 35-ը՝ շնորհակալագրեր, խորհրդանշական նվերներ և առաջարկ՝ բարձրացնել առաջադիմությունը և մասնակցել «ՀայաՔվեի» մրցույթների հաջորդ փուլերին: «ՀայաՔվեի» նախաձեռնող խմբի համակարգող Ավետիք Չալաբյանն ասում է՝ իրենք այս կրթաթոշակների սահմանմամբ երկու խնդիր են լուծել: «Մի կողմից՝ խրախուսել բարձր առաջադիմությունը, կրթությունը, զուգորդված հանրային ակտիվության հետ, մյուս կողմից՝ դա անել նրանց ընտանիքների համար, որոնք իրապես այդ կրթաթոշակների կարիքն ունեն, պայքարել են հայրենիքի համար, ցավոք, նաև սեփական կյանքի գնով: Ուզում ենք ցույց տալ, որ շնորհակալ ենք այդ ընտանիքներին, գնահատում ենք նրանց և բոլորս նրանց առջև պարտք ունենք, որը պետք է փորձենք բոլոր հնարավոր, խելամիտ միջոցներով հատուցել»,-«Փաստի» հետ զրույցում ասում է Չալաբյանը:
Ընդգծում է՝ «ՀայաՔվեի» այս և այլ նախաձեռնությունների առավել լայն նպատակը կրթված հասարակություն ունենալն է, քանի որ հայտնի փաստ է՝ պետությունների և հասարակությունների բոլոր ողբերգությունների հիմքում տգիտությունն է: «Կարծում ենք, որ մեր դժբախտությունների զգալի մասը գալիս է կրթության և ավելի ընդարձակ իմաստով աշխարհայացքի պակասից: Մարդիկ կան, որոնք ունեն ֆորմալ կրթություն, բայց իրենց աշխարհայացքը մնում է նախնադարում: Չեն կարողանում պարզ բաներն իրար հետ կապել, հետևություններ անել, չեն կարողանում «կշռել», թե որն է ավելի կարևոր՝ փողոցի ասֆա՞լտը, թե՞ կորցրած հայրենիքի մի հսկայական հատվածը: Ու ամենացավալին՝ շատերը մտածում են, որ կորսված հայրենիքն այն 120 հազար մարդու դարդն է, ոչ իրենցը: Հեմինգուեյն էր ասում՝ մի հարցրու, թե ո՞ւմ համար է զանգը ղողանջում, այն միշտ էլ քո համար է ղողանջում»,-եզրափակում է Չալաբյանը:
Մանրամասները՝ «Փաստ» օրաթերթի այսօրվա համարում
