Պուտինը վերահաստատել է Ուկրաինայի հետ առանց նախապայմանների երկխոսության պատրաստակամությունը․ Պեսկով
Միջազգային
Ռուսաստանի Դաշնության նախագահ Վլադիմիր Պուտինը Միացյալ Նահանգների նախագահի հատուկ դեսպանորդ Սթիվեն Ուիթքոֆի հետ հանդիպման ժամանակ հաստատել է ռուսական կողմի պատրաստակամությունն՝ առանց նախապայմանների բանակցել Ուկրաինայի հետ։
«Արմենպրես»-ի հաղորդմամբ՝ այս մասին հայտնում է «ՌԻԱ Նովոստի»-ն՝ մեջբերելով ՌԴ նախագահի մամուլի քարտուղար Դմիտրի Պեսկովի խոսքերը։
«Երեկ Թրամփի դեսպան Ուիթքոֆի հետ զրույցի ժամանակ Վլադիմիր Պուտինը կրկնեց, որ ռուսական կողմը պատրաստ է վերսկսել Ուկրաինայի հետ բանակցային գործընթացն առանց որևէ նախապայմանի»,-ասել է Կրեմլի խոսնակը։
Նշենք, որ նախօրեին Կրեմլում տեղի է ունեցել ՌԴ նախագահ Վլադիմիր Պուտինի և ԱՄՆ նախագահի հատուկ բանագնաց Սթիվեն Ուիթքոֆի արդեն չորրորդ հանդիպումը։
Ռուսական կողմից բանակցություններին մասնակցել են նաև նախագահի օգնական Յուրի Ուշակովը և Ռուսական ուղղակի ներդրումների հիմնադրամի գործադիր տնօրեն, նախագահի արտասահմանյան երկրների հետ ներդրումների և տնտեսական համագործակցության հարցերով հատուկ ներկայացուցիչ Կիրիլ Դմիտրիևը։
Այդ հանդիպումից հետո ԱՄՆ նախագահ Դոնալդ Թրամփը հայտարարել էր, որ Ուկրաինան ու Ռուսաստանը մոտ են համաձայնության հասնելուն։
