«Մի գդալ սեր». նոր ռոմանտիկ մելոդրամա՝ Անի Խաչիկյանի և Ներսես Ավետիսյանի մասնակցությամբ
ՄշակույթՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Շուտով կինոսիրողները հնարավորություն կունենան դիտելու նոր ռոմանտիկ մելոդրամա՝ դերասաններ Անի Խաչիկյանի և Ներսես Ավետիսյանի գլխավոր դերակատարմամբ: Նոր աշխատանքով ռեժիսոր Հրաչ Քեշիշյանը «Մի գդալ սեր» կփոխանցի հանդիսատեսին: Ֆիլմը ստեղծվել է ըստ գերմանացի գրող Փ. Ջ. Անդերսոնի «Սիրո բաղադրատոմսը» վեպի, մի պատմություն, որտեղ խոհարարությունը դառնում է սիրո, ինքնաճանաչման և հայկական ինքնության բացահայտման լեզու։ Ֆիլմի օպերատորը Մկրտիչ Մալխասյանն է:
Ֆիլմի սյուժեն միահյուսում է Հայաստանի և Բոստոնի գեղագիտական հակադրությունը՝ սրտաբաց սիրո պատմության ներքո։ Գլխավոր հերոսներին մարմնավորող Ներսես Ավետիսյանն ու Անի Խաչիկյանը խոստանում են դիտողին փոխանցել այն մի գդալ սերը, որն, ըստ հեղինակների, կարող է փոխել ամեն ինչ։
«Գիտենք, թե որքան կարևոր է այն մի գդալ սերը, որ փոխանցելու ենք հայ հանդիսատեսին։ Եվ այդ սերը մենք պատրաստ ենք փոխանցել լիարժեք նվիրվածությամբ»,- Tert.am Life-ի հետ զրույցում ասաց Անի Խաչիկյանը:
Ներսես Ավետիսյանը խոստովանեց՝ շատ ուրախ է, որ այս ֆիլմը շուտով կմտնի արտադրական փուլ։
«Ու նաև հպարտ եմ, որ աշխատելու եմ Անիի հետ՝ իմ լավագույն ընկերներից մեկի։ Մեր բեմական տանդեմն արդեն հինգ տարի է՝ գործում է հաջողությամբ, հիմա ժամանակն է էկրանի վրա նույն ներդաշնակությունը փոխանցել»,- նշեց դերասանը:
Պատմություն է մի լրագրող աղջկա մասին, որը հանգամանքների բերումով դառնում է խոհանոցի տիրուհի
Ռեժիսոր Հրաչ Քեշիշյանը հույս հայտնեց, որ սեպտեմբերին արդեն կսկսեն նկարահանումները։ «Գեղեցիկ ֆիլմ է ստացվելու: Պատմությունը շեֆ-խոհարարի մասին է և մի լրագրող աղջկա, որը հանգամանքների բերումով դառնում է խոհանոցի տիրուհի։
Սա սեր է՝ մի գդալով կամ մի գդալ սեր փոխանցելու միջոցով։ Ռոմանտիկ մելոդրամա է՝ իր խորքային շերտերով։ Բոստոնում ապրող մի հայ տղա գալիս է Հայաստան, սիրահարվում Հայաստանին ու մնում այստեղ։
Ցույց ենք տալու մեր երկրի ամենագեղեցիկ վայրերը, հայկական խոհանոցի հոգին՝ իսկական սիրով։ Սա հայ կինոյում խոհարարության շուրջ ստեղծված եզակի ֆիլմերից է»,- Tert.am Life-ի հետ զրույցում պատմեց Հրաչ Քեշիշյանը:
Նա նշեց, որ նկարահանումները հիմնականում կլինեն Հայաստանում, իսկ մի քանի տեսարաններ՝ Միացյալ Նահանգներում։
Օպերատոր Մկրտիչ Մալխասյանը հումորով նկատեց․ «Իմ ամենամեծ մարտահրավերն այս ֆիլմում չգիրանալն ու ֆորմայի մեջ մնալն է»։
Անի Խաչիկյանը հիշեց իր առաջին հեռակա շփումը Հրաչ Քեշիշյանի հետ․
«Վեցերորդ-յոթերորդ դասարանում էինք, երբ Նար-Դոս էինք անցնում դասագրքում։ Այդ նույն օրերին էկրան բարձրացավ Հրաչ Քեշիշյանի «Սպանված աղավնին»։ Դասարանով գնացինք դիտելու։ Իսկ հիմա՝ ես եմ Հրաչ Քեշիշյանի ֆիլմի հերոսուհին։ Դա ինձ համար մեծ պատիվ է»,-անկեղծացավ Անին։
Ներսես Ավետիսյանն էլ ավելացրեց՝ հիշելով իր առաջին տպավորությունը ռեժիսորի նախորդ ֆիլմերից․
«2009-ին դիտեցի «Խաչագողի հիշատակարանը» ֆիլմը։ Արդեն այդ տարիքում՝ 12-ում, մտածում էի՝ ինչու Սամվել Թոփալյանի տեղը ես չեմ։
Արդեն 10 տարի է՝ Քեշիշյանի հետ համագործակցում եմ, ու դրա համար անսահման շնորհակալ եմ»,- պատմեց դերասանը:
«Մենք հիմա մեր փոքր երեխաների հեքիաթի մեջ ենք։ Այդ իսկապես ուրախություն է, ու ես կարոտել եմ կինոն»,- ամփոփեց Անի Խաչիկյանը:
Հետևեք մեզ՝ այստեղ
