Գյումրու մանկապատանեկան մարզադպրոցի տնօրենը հափշտակել է 310 հազար դրամ աշխատավարձ
ԻրավունքՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
ՀՀ ՆԳՆ ոստիկանությունից ստացված հաղորդման հիման վրա ՀՀ հակակոռուպցիոն կոմիտեում նախաձեռնված քրեական վարույթով հիմնավորվել է, որ Գյումրու ձմեռային մարզաձևերի մանկապատանեկան մարզադպրոցի տնօրենի պաշտոնը զբաղեցրած անձը, խախտելով Գյումրու համայնքապետարանի հետ կնքված պայմանագրով սահմանված՝ գույքը երրորդ անձի օգտագործմանը հանձնելու արգելքը, իր հորը՝ մարզադպրոցի մարզչին, թույլատրել է զավթել մարզադպրոցին անհատույց տրամադրված 109,23 քմ մակերեսով վարչական շենքի գրեթե կեսը և 2024 թվականի հունիսից 2025 թվականի սեպտեմբերն ընկած ժամանակահատվածում այն որպես բնակարան վարձավճարով տրամադրել Հնդկաստանի Հանրապետության քաղաքացիներին, իսկ վարձակալության դիմաց ստացված գումարը չի մուտքագրվել մարզադպրոցի բյուջե։ Արդյունքում՝ մարզադպրոցի աշխատակիցները և սաները զրկվել են շենքի զավթված հատվածն ըստ նշանակության օգտագործելու հնարավորությունից։
Նախաքննությամբ պարզվել է նաև, որ նույն պաշտոնատար անձը 2024 թվականի սեպտեմբերի 30-ին մարզադպրոցի մարզիկներից մեկին հրամանագրել է մարզիչ-մանկավարժի հաստիքին, սակայն վերջինս 2024թ. հոկտեմբերից 2025թ. մայիսն ընկած ժամանակահատվածում չի իրականացրել մարզչական գործառույթներ, մինչդեռ նրա անվամբ հիշյալ ժամանակահատվածում հաշվարկվել և փոխանցվել է ընդհանուր 310.660 ՀՀ դրամ աշխատավարձ։
Ծառայողական լիազորությունները չարաշահելու, լիազորությունների չարաշահմամբ իրեն վստահված գույքը հափշտակելու, ինչպես նաև խմբի կազմում նախնական համաձայնությամբ պաշտոնեական կեղծիք կատարելու համար մարզադպրոցի տնօրենին մեղադրանք է ներկայացվել ՀՀ քրեական օրենսգրքի 441-րդ հոդվածի 1-ին մասով, 256-րդ հոդվածի 2-րդ մասի 2-րդ կետով և 445-րդ հոդվածի 2-րդ մասով:
Պետությանը պատճառված ընդհանուր 1․210․660 ՀՀ դրամի չափով վնասը նախաքննության ընթացքում ամբողջությամբ վերականգնվել է։
Քրեական վարույթով նախաքննությունն ավարտվել է: Վարույթի նյութերը մեղադրական եզրակացությամբ հանձնվել են հսկող դատախազին՝ այն հաստատելու և դատարան ուղարկելու միջնորդությամբ:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Հետևեք մեզ՝ այստեղ
