«Նազիկ Ավդալյան» սպորտի զարգացման հիմնադրամ կգործի. շնորհանդեսին մասնակցել է նաև ԿԳՄՍ նախարարի տեղակալը
ՍպորտՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
ԿԳՄՍ նախարարի տեղակալ Հասմիկ Ավագյանը Կ. Դեմիրճյանի անվան մարզահամերգային համալիրում մասնակցել է «Նազիկ Ավդալյան» սպորտի զարգացման հիմնադրամի շնորհանդեսի պաշտոնական միջոցառմանը:
Միջոցառմանը ներկա են եղել նաև մարզաշխարհի մի շարք ներկայացուցիչներ, հյուրեր:
Ծանրամարտի աշխարհի և Եվրոպայի չեմպիոն Նազիկ Ավդալյանը, ներկայացնելով հիմնադրամի հայեցակարգը, նշել է՝ վերջինիս առաքելությունն է ձևավորել ֆիզիկապես ու հոգեպես առողջ հասարակություն, որտեղ սպորտը դիտվում է ոչ միայն որպես հաղթանակի միջոց, այլև որպես կյանքի որակ բարձրացնող ուժ և հասարակական համերաշխության գործիք։
«Հիմնադրամի գործունեության առանցքում առողջ ապրելակերպի տարածումն ու հանրային իրազեկվածության բարձրացումն է: Այն նպատակ ունի նաև զարգացնելու սպորտային ենթակառուցվածքները, ստեղծելու մարզասրահներ և վերականգնողական կենտրոններ՝ սոցիալապես խոցելի խմբերի, սահմանամերձ և գյուղական համայնքների երիտասարդներին ներգրավելով սպորտում»,-նշել է Նազիկ Ավդալյանը՝ հավելելով, որ հիմնադրամը նախաձեռնելու է ոչ ֆորմալ կրթական ծրագրեր, մրցաշարեր և միջազգային փորձի փոխանակման նախաձեռնություններ՝ նպաստելով նաև սպորտային հոգեբանության զարգացմանը։
Առաջին խոշոր ծրագիրը կյանքի կկոչվի Շիրակի մարզի Արթիկի խոշորացված համայնքի Փանիկ գյուղում, որտեղ կառուցվելու է ժամանակակից մարզադպրոց՝ լիարժեք ենթակառուցվածքներով՝ համապատասխան միջազգային չափանիշներին։
«Սա լինելու է ոչ միայն մարզական համալիր, այլև համայնքային զարգացման և կրթության կենտրոն։ Այն կխթանի մարզական ակտիվությունը, առողջ ապրելակերպը, համայնքային ներգրավվածությունը և սոցիալական ներառումը Շիրակի մարզում և հարակից տարածքներում»,- նշել է Նազիկ Ավդալյանը։
Հիմնադրամի գործունեությունը համահունչ է ՄԱԿ-ի Կայուն զարգացման նպատակներին և ուղղված է սոցիալական ներառականության, համայնքային կայունության և հավասար հնարավորությունների ապահովմանը։
Հետևեք մեզ՝ այստեղ
