Կոնվերս Բանկն ու Asia Alliance Bank-ը ռազմավարական համագործակցություն են մեկնարկել
Հասարակություն
Կոնվերս Բանկը (Հայաստան) և Asia Alliance Bank-ը (Ուզբեկստան) պաշտոնապես հայտարարել են ռազմավարական համագործակցության մեկնարկի մասին։ Հոկտեմբերի 21-ին Վիեննայում կողմերը ստորագրել են պայմանագիր միջազգային ֆինանսական թղթակցային հաշիվների բացման և կառավարման, ինչպես նաև գլխավոր համաձայնագիր՝ արտարժութային և դրամային շուկաներում համագործակցության վերաբերյալ։
Ստորագրման արարողությունը տեղի է ունեցել BACEE-ի հոբելյանական 50-րդ համաժողովի շրջանակում, որի Ադամանդե հովանավորն էր Կոնվերս Բանկը: Այն դարձել էր կամուրջ տարբեր երկրների բանկային համակարգերի ներկայացուցիչների համար և միավորել ֆինանսական ոլորտի համաշխարհային առաջատարներին՝ ոլորտի զարգացման հեռանկարներն ու հնարավորությունները քննարկելու և նոր գործընկերային հարաբերություններ ստեղծելու նպատակով:
Կոնվերս Բանկում նշել են, որ այս գործակցությունը միտված է ընդլայնելու Կոնվերս Բանկի միջազգային գործընկերային ցանցը և ընդլայնելու միջազգային ֆինանսական շուկաներին հաճախորդների առավելագույն հասանելիությունը։
Կոնվերս Բանկի գլխավոր գործադիր տնօրենի տեղակալ, ֆինանսական տնօրեն Հրանտ Հակոբյանն ասում է․ «Վստահ ենք, որ Asia Alliance Bank-ի հետ այս գործընկերությունը ոչ միայն նոր հնարավորություններ կստեղծի բանկերի հաճախորդների համար, այլև կնպաստի Կոնվերս Բանկի՝ միջազգային ֆինանսական շուկաներին ինտեգրացիայի մակարդակի բարձրացմանը և առաջատար դիրքի ամրապնդմանը»:
Նշվել է նաև, որ վերջին մեկ տարվա ընթացքում միջազգային գործընկերային ցանցի ընդլայնման ռազմավարության շրջանակում Կոնվերս Բանկը համագործակցության պայմանագրեր է կնքել առաջատար ևս մի քանի կառույցի հետ:
Կոնվերս Բանկը վերահսկվում է ՀՀ ԿԲ կողմից:
