Չինաստանում անցկացվող ցուցահանդեսի ժամանակ տղան պատահաբար 280 հազար դոլար արժողությամբ թագ է կոտրել

Պեկինում տեղի ունեցած ցուցահանդեսի ժամանակ տղան պատահաբար վայր է գցել 280 հազար դոլար արժողությամբ ոսկե թագը, ինչի հետևանքով էքսպոնատը լուրջ վնասվածքներ է ստացել։ Այս մասին գրում է South China Morning Post թերթը։

Պարբերականի տեղեկություններով՝ երկու կիլոգրամ կշռող ոսկե թագը որպես նվեր պատրաստել է մի նկարիչ՝ համացանցում հայտնի չինացի աստղ Չժան Կայիի ամուսինը։ Առարկան ներկայացված է եղել Չինաստանի մայրաքաղաքի Beijing X Museum-ում՝ ևս 86 արվեստագետների աշխատանքների հետ միասին՝ սիրո թեմային նվիրված ցուցահանդեսի շրջանակներում։

Ինչպես հայտնել է թերթը, դեկտեմբերին թագն ուժեղ վնասվել է։ Չժան Կայիի կողմից սոցցանցերում հրապարակված տեսահսկման խցիկների տեսագրության մեջ երևում է, թե ինչպես է ցուցասրահում մի կին փորձում բջջային հեռախոսով լուսանկարել թագը, իսկ նրա որդին սրբում է էքսպոնատի թափանցիկ պաշտպանիչ պատյանը, որպեսզի մայրը կարողանա ավելի որակյալ լուսանկար անել։ Պատյանը, որն ամուր ամրացված չի եղել պատվանդանին, ընկել է և թագը ջարդվել է։

Չժան Կային իր սոցիալական ցանցերում հայտնել է, որ տեսանյութը չի հրապարակել է մորից և որդուց փոխհատուցում պահանջելու նպատակով։ Նա տեղեկացրել է, որ թագն ապահովագրված է եղել։ Նրա խոսքով՝ ապահովագրական ընկերությունը, թանգարանը, ինչպես նաև ինքն ու իր ամուսինը համատեղ կկրեն վնասները։ Աղջիկը նաև հիշեցրել է ծնողներին ցուցահանդեսների ժամանակ իրենց երեխաներին հսկելու անհրաժեշտության մասին։

Ինչպես գրում է թերթը, համացանցի օգտատերերի կարծիքներն այս իրավիճակի վերաբերյալ բաժանվել են։ Ոմանք քննադատել են մորն ու որդուն, իսկ մյուսները պնդել են, որ պատասխանատվությունը պետք է կրի ցուցահանդեսի կազմակերպիչը՝ պատյանը պատվանդանին պատշաճ կերպով չամրացնելու համար։