Ինչու են թրթռում աչքերը եւ ինչ անել՝ դրանից ազատվելու համար

Աչքի կամ ավելի ճիշտ՝ աչքի կոպի թրթռոցը բավական տհաճ երեւույթ է։ Ժողովրդի մեջ աչքի թրթռոցը ընդունված է կապել սնահավատ տարատեսակ երեւույթների հետ, սակայն դրա իրական պատճառը զուտ ֆիզիկական բնույթ ունի։ Պատճառներն էլ մի քանիսն են, ահա դրանք։

Քնի պակաս
ԱՄՆ-ի քնի ազգային ֆոնդը (National Sleep Foundation) խորհուրդ է տալիս մեծահասակներին քնել 7-9 ժամ։ Քնի պակասը, ըստ մասնագետների, մի շարք խնդիրների է բերում, որոնցից մեկն էլ կարող է լինել աչքի թրթռալը։ Եթե մի քանի օր շարունակ ուշ եք քնում, շուտ արթնանում, կարող եք բախվել այս խնդրին։

Սթրես
Սթրեսը, լարվածությունը, դյուրագրգիռ վիճակը եւս կարող են պատճառ դառնալ աչքի թրթռոցի։ Նման դեպքում փորձեք թուլանալ, զբոսնեք մաքուր օդին, մերսման գնացեք եւ այլն։

Էլեկտրոլիտներ
Եթե աչքը հաճախ է թրթռում, ապա հնարավոր է, որ սննդի մեջ էլեկտրոլիտների պակաս կա։ Օգտագործեք կալցիումով եւ մագնեզիումով հարուստ սնունդ, քանի որ դրանք բարելավում են մկանների աշխատանքը։ Շատ կերեք բանան եւ ընկույզ, ինչպես նաեւ լոբազգիներ։

Աչքերի լարվածություն

Եթե համակարգչով շատ եք աշխատում, կամ չեք կարողանում կտրվել ձեր սմարթֆոններից, ապա աչքերի լարումից չեք խուսափի, ինչն էլ իր հերթին կարող է աչքի թրթռոց առաջացնել։

Կոֆեին եւ դեղեր
Կոֆեինը, որոշ դեղամիջոցների կողմնակի ազդեցությունները նույնպես կարող են բերել աչքի թրթռոցի։

Ինչ անել՝ խնդրից ազատվելու համար

Եթե ձեզ նյարդայնացնում է թրթռացող աչքը, ապա կարող եք մի շարք միջոցներով ազատվել դրանից։ Փակեք աչքն ու նրբորեն մերսեք կոպը։ Գոլ ջրով կամ թեյով թրջոց դրեք։

Սակայն եթե աչքի թրթռոցն ուղեկցվում է կարմրությամբ, աչքից արտադրություն է գալիս, ուռած է, ապա անհրաժեշտ է ակնաբույժի դիմել, դա կարող է ինֆեկցիոն հիվանդության արդյունք լինել։