Չինաստանը պատվիրակություն կուղարկի Իսրայել՝ դեսպանի մահվան հանգամանքներն ուսումնասիրելու համար
InternationalՄայիսի 18-ին Չինաստանը հատուկ խումբ կուղարկի Իսրայել՝ հրեական պետությունում չինացի դեսպան Դու Վեյի մահվան հանգամանքների ներքին քննություն անցկացնելու համար, որին մահացած էին գտել մայիսի 17-ի առավոտյան Թել Ավիվի մերձակայքում գտնվող իր նստավայրում, հայտնում է Haaretz-ը:
Պարբերականի տեղեկություններով, որը վկայակոչում է իր աղբյուրներին, «հատուկ խումբը» կանցկացնի դեսպանի մահվան հանգամանքների «ներքին քննություն» եւ կզբաղվի Իսրայելում Չինաստանի դիվանագիտական ներկայացուցչության «գործունեության համակարգմամբ»: Դրանից վացի, դրա խնդիրների մեջ է մտնելու դիվանագետի մարմինը հայրենիք փոխադրելու կազմակերպումը, իսկ հատուկ խմբի հետ Իսրայել է մեկնելու Վեյի ընտանիքի ներկայացուցիչը, նշում է պարբերականը: Դու Վեյը Իսրայելում Չինաստանի դեսպանի պաշտոնը զբաղեցնում էր 2020 թվականի փետրվարից:
Չինաստանի կենտրոնական հեռուստատեսությունը կիրակի հայտնել էր, որ հրեական պետությունում դեսպանը մահացել էր առողջական վիճակի հետ կապված պատճառներով՝ նշելով, որ դեսպանի մահվան պատճառը «պահանջում է լրացուցիչ ստուգում եւ հաստատում»: Չինաստանի ԱԳՆ-ն դիվանագետի ընտանիքի անդամներին խորին ցավակցություն է հայտնել:
Կիրակի ավելի վաղ Չինաստանի դեսպանի մահվան կապակցությամբ ցավակցություններ էր հայտնել հրեական պետության արտաքին քաղաքականության գերատեսչության ղեկավար Իսրայել Կացը: «Ինձ ցնցել է Իսրայելում Չինաստանի դեսպան Դու Վեյի հանկարծահաս մահը: Դեսպան Դու Վեյն ականավոր դիվանագետ էր, Իսրայելում լինելու կարճ ժամանակում նա հասցրել է իր ավանդը բերել մեր պետությունների հարաբերությունների զարգացման գործում»,- Կացի խոսքը տարածել է նրա մամուլի ծառայությունը:
