Թուրքիան սպառնում է քննարկել Հունաստանի ինքնիշխանությունը կղզիների նկատմամբ

Թուրքիան միջազգային արշավ կսկսի մի շարք կղզիների նկատմամբ Հունաստանի ինքնիշխանության քննարկումը սկսելու համար, եթե Հունաստանը չհանի իր զենքերն այնտեղից, հայտարարել է Թուրքիայի արտգործնախարար Մևլութ Չավուշօղլուն, գրում է հունական Kathimerini թերթը փետրվարի 10-ին։

Ելույթ ունենալով թուրքական TRT հեռուստաընկերության եթերում՝ Չավուշօղլուն ասել է, որ Թուրքիան երկու նամակ է ուղարկել ՄԱԿ՝ կապված Հունաստանի կողմից կղզիների ապառազմականացման խախտման հետ։ Դիվանագետը հայտնել է, որ կղզիները Հունաստանին են փոխանցվել 1923 թվականին Լոզանի պայմանագրով, իսկ 1947 թվականին՝ Փարիզի պայմանագրով՝ ապառազմականացման պայմանով։ Սակայն, ըստ նրա, Հունաստանը 1960 թվականից խախտում է այս ռեժիմը։

Չավուշօղլուն ասել է, որ եթե Հունաստանը չհրաժարվի կղզիներում զենք տեղակայելուց, ապա պայմանավորվածությունները կխախտվեն, և հնարավոր կլինի քննարկել այդ կղզիների սեփականության հարցը։ «Անհրաժեշտության դեպքում մենք վերջնական նախազգուշացումներ կանենք, որից հետո կսկսվի քննարկումը»,- ասել է դիվանագետը։

Չավուշօղլուն ընդգծել է, որ Հունաստանը չի վիճարկում ռազմականացման փաստը, այլ պնդում է, որ Թուրքիայի կողմից սպառնալիք կա։

«Սա [սպառնալիքի դրույթը] կա՞ պայմանագրերում: Ոչ: Այսպիսով, կղզիներում տեղակայված սակավաթիվ զենքերով և սակավաթիվ զինվորներով կարելի՞ է կասեցնել այս սպառնալիքը: Սա նույնպես իրատեսական չէ»,- եզրափակել է Չավուշօղլուն և եզրակացրել, որ Հունաստանը սուտ է ասում՝ կապելով սպառնալիքն ու ռազմականացումը։

Նրա խոսքով՝ 2022 թվականին Հունաստանը 229 անգամ խախտել է ապառազմականացման ռեժիմը։