Ռախմանինով-150. երկու օրերի ընթացքում ներկայացվեցին Ռախմանինովի 5 կոնցերտները
Socity
Հայաստանի պետական սիմֆոնիկ նվագախումբը հուլիսի 12-ին և 13-ին ներկայացել է ականավոր կոմպոզիտոր Սերգեյ Ռախմանինովի ծննդյան 150-ամյակին նվիրված երկու համերգով։ Համերգների ընթացքում կատարվել են Ռախմանինովի 5 դաշնամուրային կոնցերտները։ Դաշնակահարներ Թեո Գեորգիուն կատարել է Դաշնամուրի թիվ 1 կոնցերտը, Ալեքսանդր Ռոմանովսկին՝ թիվ 3 կոնցերտը, Անդրեյ Գուգնինը՝ 4-րդ կոնցերտը, Դմիտրի Իշխանովը՝ Ռապսոդիան՝ Պագանինիի թեմայով, և Անաստասիա Տերենկովան՝ Ռախմանինովի Դաշնամուրի թիվ 2 կոնցերտը։
Դասական երաժշտության, հատկապես Ռախմանինովի արվեստի սիրահարները հնարավորություն ունեցան երկու օրերի ընթացքում վայելելու նրա երաժշտության ամբողջ հմայքը։
Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը կարևորում է, որ 2 երեկոյի ընթացքում ներկայացվել են Ռախմանինովի 5 կոնցերտները, որոնք իր և նվագախմբի համար մեծ արժեք ունեն։ Լրագրողների հարցին՝ արդյոք հե՞շտ ստացվեց մենակատարների, նվագախմբի և դիրիժորի համագործակցությունն այս երկու համերգների ընթացքում, մաեստրո Սմբատյանը պատասխանեց. «Պրոֆեսիոնալ ասպարեզում հեշտ ու դժվարը փորձերն են, գեղարվեստական փոխըմբռնման պրոցեսը, որը երաժիշտներն անցնում են համերգից առաջ։ Իհարկե, ժամանակը միշտ չի բավականացնում, ուստի նվագախումբը շատ ճկուն պետք է լինի, որպեսզի կարողանա երկու օրերի ընթացքում աշխատել 5 մենակատարի հետ։ Ռախմանինովի երաժշտությունը շատ անհատական է, ռոմանտիկ, մենակատարն այստեղ պետք է լինի դոմինանտ, ինչը բնորոշ է ռուսական ռոմանտիկ երաժշտությանը»։ Դիրիժորը նաև երախտագիտություն հայտնեց գործընկերներին, որոնք աջակցում են դասական երաժշտությանը. «Ռախմանինովին նվիրված համերգների բացառիկ հովանավորը Զանգեզուրի պղնձամոլիբդենային կոմբինատն է: Մարդիկ հավատացին գաղափարին և հնարավորություն տվեցին, որպեսզի իրականացնենք այս հավակնոտ ծրագիրը: Որ դասական երաժշտությունը շատ կարևոր է, գիտեն բոլորը, բայց քչերն են այդ փաստն ընդունելուց հետո գործողություններ կատարում։ Մենք ուրախ ենք, որ մեր կողքին կան մարդիկ, որոնք մեզ տալիս են ավելի մեծ երազելու հնարավորություն»:
Դաշնակահար Դմիտրի Իշխանովը նկատում է, որ Ռախմանինովի երաժշտությունն անչափ հարազատ է իրեն, հետաքրքիր է հետևել նրա ստեղծագործական ուղուն։ Մենակատարը նաև ասում է, որ պետք է համապատասխան պատրաստվածություն ունենալ՝ Ռախմանինովի ստեղծագործությունների տեխնիկական նրբությունները հաղթահարելու համար։ Իշխանովի խոսքով՝ Ռախմանինովի ֆենոմենը մեղեդիները հարմոնիկ միաձուլելու նրա վարպետության մեջ է։
Դաշնակահար Անդրեյ Գուգնինը նշում է, որ Ռուսաստանում մեծացած յուրաքանչյուր երաժիշտ, հատկապես դաշնակահարները, գտնվում է Սերգեյ Ռախմանինովի, նրա երաժշտության ազդեցության ներքո։ Ինքը շատ վաղ հասակից է շփվել Ռախմանինովի արվեստի հետ, անգիր գիտի նրա կոնցերտները։ Գուգնինի խոսքով՝ կոմպոզիտոր և դաշնակահար Ռախմանինովի գրած ստեղծագործություններն անբացատրելի գեղեցիկ են ու խորը, իսկ կատարման առումով՝ շատ հարմար։
