Իսրայելը պետք է պատժվի և կպատժվի. Խամենեի
InternationalՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Իրանի գերագույն առաջնորդ այաթոլլա Ալի Խամենեին զգուշացրել է, որ Իսրայելը «պետք է պատժվի և կպատժվի» Սիրիայում Իրանի հյուպատոսության մահաբեր ռմբակոծության համար։ Այս մասին գրում է CNN-ը:
Իրանական պետական հեռուստատեսության տվյալներով՝ ավիահարվածի հետևանքով ավերվել է հյուպատոսարանը և սպանվել է Իրանի յոթ պաշտոնյա, ինչպես նաև առնվազն վեց սիրիացի: Հարձակումից հետո Իրանը խոստացել է վրեժ լուծել:
«Երբ նրանք հարձակվեցին մեր հյուպատոսության վրա, դա նման էր մեր հողի վրա հարձակմանը: Սա միջազգային նորմ է։ Չարագործ վարչակարգը սխալ է թույլ տվել և պետք է պատժվի, և այդպես էլ կլինի», - ասել է Խամենեին չորեքշաբթի հայտարարության մեջ:
Նախօրեին Իսրայելի արտգործնախարար Իսրայել Կացը Kan ռադիոյին տված հարցազրույցում ասել էր, որ եթե Իրանը սեփական տարածքից հարձակում իրականացնի Իսրայելի տարածքի վրա, Իսրայելը կպատասխանի Իրանի տարածքում։
«Եթե Իրանն Իսրայելի վրա հարձակվի իր տարածքից, Իսրայելը կպատասխանի Իրանի տարածքում, քանի որ Իսրայելը, սեփական քաղաքացիների հանդեպ պատասխանատվության պատճառով, չի կարող իրեն թույլ տալ հանդուրժել նման տեսակի հարձակումներ»,- ասել է Կացը:
Իսրայելի ԱԳՆ ղեկավարի խոսքով՝ «Իրանն օձի գլուխն է»։
«Առանց Իրանի չկա ՀԱՄԱՍ, չկան հուսիներ, չկա «Հեզբոլլահ»»,- հավելել է նա։
Իսրայելը նաև կարծում է, որ Իրանի հնարավոր հարվածը ուղղված կլինի ռազմական կամ ռազմավարական թիրախներին, այլ ոչ թե քաղաքացիական ենթակառուցվածքներին, նշում է հրատարակությունը։
Իսրայելական կողմը հնարավոր հարձակման է պատրաստվում ինչպես տարածաշրջանում գտնվող իրանական պրոքսիներից որևէ մեկի, այնպես էլ հենց Իրանի կողմից՝ չբացառելով հարձակման հնարավորությունը միանգամից մի քանի ուղղությունից, նշում է The Times of Israel-ը։
Ավելի վաղ Իսրայելի պաշտպանության նախարարության ղեկավար Յոավ Գալանտը հայտարարել էր, որ ռազմական գերատեսչությունն ավարտել է նախապատրաստական աշխատանքները՝ արձագանքելու ցանկացած հնարավոր սցենարին, որը «կարող է տեղի ունենալ Իրանի հետ կապված»:
Ապրիլի 1-ին իսրայելցի զինվորականները հարձակվել են Դամասկոսի դիվանագիտական թաղամասի վրա, որտեղ գտնվում է Իրանի հյուպատոսությունը։ Հյուպատոսությունն ամբողջությամբ ավերվել է. հարձակման հետևանքով զոհվել են իրանցի գեներալներ Մոհամմադ Ռեզա Զահեդին և Մոհամմադ Հադի Հաջա Ռահիմին, ինչպես նաև Իսլամական հեղափոխության պահապանների կորպուսի հինգ սպա: Էբրահիմ Ռաիսին ասել է, որ հարվածի հեղինակներն ու հովանավորները «կպատժվեն մոջահեդների ձեռքով»։
