ԱՄՆ-ն հետախուզական տեղեկություն են ստացել, որ Իրանը Թրամփի դեմ մահափորձ է ծրագրել. Թեհրանը հերքում է. CNN
InternationalՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
ԱՄՆ իշխանությունները վերջին շաբաթներին աղբյուրից հետախուզական տեղեկություն են ստացել Իրանի կողմից նախագահի թեկնածու Դոնալդ Թրամփի դեմ մահափորձ իրականացնելու դավադրության վերաբերյալ, ինչը հանգեցրել է ԱՄՆ Գաղտնի ծառայության կողմից նախկին նախագահի անվտանգության ուժեղացմանը, CNN-ին հայտնել են բազմաթիվ մարդիկ, որոնք այդ մասին տեղեկացված են:
Սակայն որևէ նշան չկա, որ 20-ամյա Թոմաս Մեթյու Քրուքսը, որը շաբաթ օրը Փենսիլվանիայում հանրահավաքի ժամանակ փորձել էր սպանել նախկին նախագահին և վնասել էր նրա ականջը, կապված է եղել իրանական կողմի դավադրության հետ, ասել են աղբյուրները:
CNN-ը նկատում է, որ թշնամական օտարերկրյա հետախուզական գործակալության կողմից նման սպառնալիքի առկայությունը և Թրամփի անվտանգության ուժեղացումը նոր հարցեր են առաջացնում Փենսիլվանիայում շաբաթօրյա հանրահավաքում անվտանգության բացթողումների և նրա վերաբերյալ, թե ինչպես է 20-ամյա երիտասարդին հաջողվել մուտք գործել տարածք ու դիրքավորվել՝ տանիքից նախկին նախագահին կրակելու համար:
ԱՄՆ ազգային անվտանգության պաշտոնյան ասել է, որ Գաղտնի ծառայությունը և Թրամփի շտաբը տեղյակ են եղել սպառնալիքի մասին շաբաթ օրվա հանրահավաքից առաջ:
«Գաղտնի ծառայությունն իմացել է այս սպառնալիքի մասին: Ազգային անվտանգության խորհուրդն ուղիղ կապ է հաստատել ԱՄՆ Անվտանգության ծառայության հետ բարձրագույն մակարդակով, որպեսզի համոզվի, որ նրանք շարունակում են հետևել վերջին հաշվետվությանը: ԱՄՆ Անվտանգության ծառայությունը կիսվել է այս տեղեկատվությամբ, և Թրամփի շտաբը տեղեկացվել է զարգացող սպառնալիքի մասին: Ի պատասխան աճող սպառնալիքի՝ Գաղտնի ծառայությունն ավելացրել է ռեսուրսներն ու ակտիվները՝ նախկին նախագահ Թրամփի պաշտպանության համար։ Այս ամենը եղել է շաբաթ օրվանից առաջ», - CNN-ին ասել է պաշտոնյան:
Թրամփի նախընտրական շտաբը չի բացահայտել, թե արդյոք տեղյակ է եղել Իրանի սպառնալիքի մասին:
«Մենք չենք մեկնաբանում նախագահ Թրամփի անվտանգության մանրամասները։ Բոլոր հարցերը պետք է ուղղվեն Միացյալ Նահանգների Գաղտնի ծառայությանը»,- ասվում է արշավի հայտարարության մեջ:Գաղտնի ծառայության պաշտոնյաները բազմիցս զգուշացրել են Թրամփի շտաբին բացօթյա հանրահավաքների անցկացման վերաբերյալ, քանի որ դրանք ավելի մեծ վտանգ են ներկայացնում, քան հավաքները, որոնց մուտքը Գաղտնի ծառայությունը կարող է ավելի լավ վերահսկել, պատմել են քաջատեղյակ աղբյուրները: Աղբյուրները նշում են, որ նախազգուշացումներն ավելի ընդհանուր բնույթ են կրել:
ՄԱԿ-ում Իրանի Իսլամական Հանրապետության մշտական ներկայացուցչությունը հերքել է Թրամփի դեմ իր երկրի դավադրությունը:
«Այդ մեղադրանքները չհիմնավորված են և չարամիտ: Իրանի Իսլամական Հանրապետության տեսանկյունից՝ Թրամփը հանցագործ է, որը պետք է քրեական պատասխանատվության ենթարկվի և պատժվի դատական կարգով՝ գեներալ Սոլեյմանիի (Իրանի Իսլամական հեղափոխության պահապանների կորպուսի հրամանատար Ղասեմ Սոլեյմանին, որը սպանվել էր 2020 թվականի հունվարին Բաղդադի միջազգային օդանավակայանում ԱՄՆ ավիահարվածից-Խմբ.) սպանությունը պատվիրելու համար։ Իրանն ընտրել է օրինական ճանապարհը՝ նրան պատասխանատվության ենթարկելու համար», - CNN-ին ասել է առաքելության ներկայացուցիչը:
