Մտադիր են հեռացնել ապազգային իշխանություններին. «Փաստ»
Press
«Փաստ» օրաթերթը գրում է.
Մինչ Հայաստանի գործող իշխանությունները սարսափահար են լինում հենց միայն Ղարաբաղ, առավել ևս՝ Արցախ բառերից, Հայաստանում տեղի ունեցած միջոցառումներից մեկն օրերս սկսվել է ոչ միայն Հայաստանի Հանրապետության, այլև Արցախի Հանրապետության օրհներգերով: Խոսքը «Համահայկական միասնության խորհուրդ» միավորման հիմնադիր համաժողովի մասին է, որով, ըստ էության, հայտարարվեց նոր ուժի ստեղծման մասին:
Հիշեցնենք, որ այս Խորհրդի ձևավորման նախաձեռնությունը պատկանում է «Համահայկական ճակատ» շարժման առաջնորդ, գեներալ-մայոր Արշակ Կարապետյանին ու «Հայոց աշխարհազոր» ռազմաքաղաքական միավորման խորհրդի նախագահ Ալբերտ Բազեյանին: Համաժողովը բավական մարդաշատ է եղել, ներկա են գտնվել մի քանի տասնյակ ազգային քաղաքական և հասարակական կազմակերպությունների, հայրենակցական միությունների, մշակութային և մարզական միությունների, հիմնադրամների, գիտական և բարեգործական միությունների ներկայացուցիչներ և անհատ գործիչներ: Ընդ որում, «Փաստի» տեղեկություններով, Խորհրդին միանալու ցանկություն ունեցողների քանակն այնքան շատ է եղել, որ ստիպված են եղել դահլիճում հավելյալ աթոռներ ապահովել:
Համաժողովի ժամանակ բավականին սուր ելույթներ են եղել, ներկաները քննադատել են ներկա իշխանությունների գործունեությունը, իրականացվող ներքին ու արտաքին քաղաքականությունը՝ այն որակելով որպես «թրքահաճո»:
«Համահայկական ճակատ» շարժման առաջնորդ Արշակ Կարապետյանն ասել է, որ հայ ժողովուրդն այսօր ունի լուրջ անվտանգային խնդիր և կանգնած է պետականությունը կորցնելու շեմին: «Լուծումը հստակ է՝ լինել ակտիվ, համախմբվել ազգային գաղափարների շուրջ՝ անկախ քաղաքական հայացքներից, ու իրականացնել իշխանափոխություն»:
Ալբերտ Բազեյանն իր հերթին նշել է, որ ձևավորում են այլընտրանք այս իշխանություններին ու եղանակները տաքանալուն պես ոտքի են հանելու մեր ժողովրդին՝ «հեռացնելու այս ապազգային իշխանությանը»:
Մանրամասները՝ «Փաստ» օրաթերթի այսօրվա համարում
