Ի՞նչ զարգացումներ կան Պեմզաշենի դաժան uպանության դատավարությունից, ե՞րբ այն կավարտվի
Socity
2022 թվականի նոյեմբերի 9-ին դաժան սպանություն տեղի ունեցավ, որը ցնցեց ամբողջ Հայաստանը. հայտնաբերվել էին Շիրակի մարզի Պեմզաշեն գյուղի 31-ամյա բնակչի` Զարինե Մելիքսեթյանի ու նրա 11 և 8 տարեկան երեխաների դիերը։ Հետո կպարզվեր, որ նախքան սպանությունը, մորն ու երեխաներին բռնության են ենթարկել, այդ թվում և սեռական…
Գործով մեղադրյալները Վրույր և Արկադի Բարսեղյաններն են։ Վրույր Բարսեղյանը բռնաբարության մասով ընդունել է իրեն առաջադրված մեղադրանքը, սակայն, սպանության համար իրեն մեղավոր չի ճանաչում։ Մյուս մեղադրյալը` Արկադի Բարսեղյանը, հայտարարել է՝ կապ չունի ո՛չ բռնաբարության, ո՛չ էլ սպանության հետ։
Նշենք, որ կեսգիշերին, նախապես պայմանավորվածության գալով, Վրույրն ու Արկադին ներխուժել են Զարինեի տուն, ներխուժումը նկատած երիտասարդ կնոջը դանակահարել, ապա այդ աղմուկին վրա հասած երեխաներին կապել, Զարինեին տեղափոխել ննջասենյակ, որտեղ տասնյակից ավելի հարված հասցրել դանակով՝ պատճառելով կյանքի հետ անհամատեղելի վնասվածքներ: Ապա սպանել երեխաներին, քանի որ նրանք ականատեսն են ու կարող են իրենց ճանաչել, բայց նախքան դա բռնաբարել Զարինեի անչափահաս դստերը:
MediaHub-ը հիշեցնում է, որ մեղադրյալ Վրույր Բարսեղյանը ընդունել է մեղքը՝ հայտարարելով, թե բռնաբարել է 11-ամյա Կարինեին, բայց պնդել՝ սպանության հետ կապ չունի:
«Ես սպանության հետ գործ չունեմ, ես բռնաբարության մեջ իմ մեղքն ընդունում եմ, բայց էդ մարդկանց սպանելը հարյուր տոկոսով ես չեմ... եթե ես չբռնաբարեի, ես կընկնեի Զարինեի օրը...»,- ասել է նա։
Այդ զազրելի արարքի մասին խոսելիս տականքը նաև նշել է, թե ազգական Արկադի Բարսեղյանի առաջ միշտ տուժող է եղել, միշտ «կանչել ու ծեծել ա»: Դատական նիստերից մեկի ժամանակ պարզվել էր, որ այս դաժանությունն արվել է, որ ջրի երես դուրս չգա Արկադի Բարսեղյանի կողմից Զարինե Մելիքսեթյանին նախկինում արված արտամուսնական կապ ունենալու առաջարկը, քանի որ օրեր անց Զարինեի ամուսինը պետք է վերադառնար Հայաստան:
Ի՞նչ զարգացումներ կան, ինչպե՞ս է ընթանում դատավարությունը, արդյո՞ք մեղադրյալները ընդունել են մեղքը. այս և այլ հարցերի շուրջ MediaHub-ը զրուցեց տուժող կողմի փաստաբան Գարիկ Գալիկյանի հետ։
«Նորություն չկա, վկաներն են հարցաքննվում, այլ նորություններ բացարձակ չկան։ Այս պահին վկաների փուլում ենք, դրանից հետո կգա միջնորդությունների փուլ, մինչև հասնենք եզրափակիչ ելույթներին»,– նշեց Գալիկյանը։
Հարցին՝ արդյո՞ք այդ երկու անձանց նկատմամբ խափանման միջոցը չի փոխվել, փաստաբանը պատասխանեց․ «Ոչ, ոչ»։
Մեր հարցին, թե ե՞րբ կավարտվի դատավարությունը, դեռ որքա՞ն ժամանակ կտևի, փաստաբանը նշեց՝ չի կարող որևէ հստակ բան ասել։
Հիշեցնենք, երկու ամիս առաջ հայտնի դարձավ, որ Պեմզաշենում դաժանաբար սպանված մոր և երկու երեխաների ընտանիքի հոր՝ Սևակ Մելիքսեթյանի և սպանության գործով մեղադրյալ Արկադի Բարսեղյանի պաշտպանի միջև ծեծկռտուք է եղել դատական նիստից հետո, և նույնիսկ ոստիկանության ծառայողները բերման են ենթարկել ծեծկռտուքի մասնակիցներին։
MediaHub-ը կապ էր հաստատել Սևակ Մելիքսեթյանի հետ, ով նշել էր, որ ամենը նորմալ է: «Ինձ բերման չե՛ն ենթարկել»,- ասել էր Մելիքսեթյանը։
ՔԿ–ից հայտնել էին, որ Երևան քաղաքի առաջին ատյանի ընդհանուր իրավասության քրեական դատարանի «Շենգավիթ» նստավայրում նշանակված դատական նիստից հետո երկու կողմերի ներկայացուցիչների միջև տեղի է ունեցել ծեծկռտուք: Դեպքի առթիվ ՀՀ ՔԿ Շենգավիթ վարչական շրջանի քննչական բաժնում Քրեական օրենսգրքի 297-րդ հոդվածի 2-րդ մասի 1-ին կետով նախաձեռնվել է քրեական վարույթ։
Մարիաննա Արամյան
