Աշխարհում մարդիկ ամբիոն են գրավում, թույլ չեն տալիս, որ նիստ անեն․ Մելիքյանին զայրացրել է այսօրվա ընդունած նախագիծը
Այս նախագիծը կոպտագույն կերպով խախտում է Սահմանադրությունը: Այս մասին լրագրողների հետ զրույցում հայտարարել է Ռուբեն Մելիքյանը՝ խոսելով խորհրդարանում այսօր իմքայլականների կողմից անցկացրած նախագծի մասին, որն ընդլայնում է ԲԴԽ-ի լիազորությունները:
«Ով է տեսել, որ դատավորը գործ քննի ու ինչ-որ մարմին ընթացքում որոշի, որ գործը վերցնում է այդ դատավորից: Սա արդարադատության իրականացման գործընթացի կոպտագույն խախտում է:
Դատարանը, երբ սկսում է արդարադատության իրականացումը, պետք է ավարտին հասցնի այն: Արդարադատության իրականացումից պետք է առաջնորդվի բացառապես օրենքով, իսկ այս նախագիծը թույլ է տալիս, որ ԲԴԽ-ն շատ անորոշ չափանիշներով գործը վերցնել տվյալ դատավորի ձեռքից և տալ մեկ այլ դատավորի: Ով է նման բան տեսել»:
Մելիքյանը նշեց, որ ինքը բանավեճ չունի իշխանությունների հետ, քանի որ իմաստ չի տեսնում, իր բանավեճն ընդդիմության հետ է:
Հարցին, թե ինչ պետք է անի այս դեպքում ընդդիմությունը, նա ասաց. «Աշխարհում տեսնում եք, թե ինչ է լինում, մարդիկ վեր են կենում, ամբիոնը գրավում են ու ասում են, որ թույլ չեն տալիս նիստ անել: Ոչ թե գալստուկով գալիս նստում են, հարցեր տալիս ու գալչկաներ դնում: Կներեք, ես՝ որպես քաղաքացի, շատ վրդովված եմ»:
