Փաշինյանի իշխանության գլխավոր առանցքները

Խորհրդարանական արտահերթ ընտրություններում իշխող «Քաղաքացիական պայմանագիր» կուսակցության արձանագրած «պյուռոսյան» հաղթանակը Նիկոլ Փաշինյանին և նրա մերձավոր շրջապատին հույս էր տվել, թե կհաջողվի պահպանել վարչախմբի ամբողջականությունը։ Կարճ ժամանակ անց, սակայն, իշխանության ներսում օբյեկտիվորեն նոր առանցքներ են ձևավորվում։ Ակնհայտ է, որ իշխանության մեջ պետք է թևեր առաջանային: Դրանցից յուրաքանչյուրը, ընդհանուր շահերից բացի, նաև սեփական օրակարգն ու շահերն ունի և փորձելու է իր քաղաքական խաղը խաղալ։ Այս պահի դրությամբ, անվրեպ կարելի է խոսել, որ գործող իշխանության ներսում առնվազն երեք առանցք է ձևավորվել, որոնք իրար հետ դեռևս գոյակցում են։

Գործող իշխանության կազմում քիչ չեն ռուսական կողմնորոշում ունեցողները։ Վերջիններս նոր առաջնորդ են գտել՝ ի դեմս Ալեն Սիմոնյանի, որի միջոցով էլ առայժմ բավական նուրբ քարոզչություն են իրականացնում, զատվում Նիկոլ Փաշինյանից։ Սիմոնյանը Ռուսաստանում ավելի ընկալելի կերպար է համարվում, քան վարչապետ Նիկոլ Փաշինյանը։ Նիկոլ Փաշինյանն իշխանական քարոզչամեքենայի և սպասարկուների օգնությամբ փորձում էր քարոզչական փուչիկ փչել, իր իշխանության օրոք իրականացված միակ ակնառու գործը՝ ասֆալտապատումն օգտագործելով։ Գիտակցելով, որ իր համար բարդ է լինելու իշխանության հետագա պահպանումը՝ Փաշինյանը փորձում էր Սուրեն Պապիկյանից իր հնարավոր հետնորդ կերտել։ Նրան նույնիսկ փոխվարչապետ նշանակեցին, թեև կուսակցության ներսում առանձնապես խանդավառված չեն Պապիկյանի կազմակերպչական և մարդկային որակներով։ Պապիկյանին պաշտպանության նախարար նշանակելու հանգամանքը, փաստացի, փշրեց Փաշինյանի այս մտահղացումը։

Նախընտրելով վերահսկողություն սահմանել զինված ուժերի վրա՝ վարչապետի պաշտոնը զբաղեցնող անձը այսօր կանգնած է նոր առանցք ձևավորելու շուրջ։ Հին ՔՊ-ականներին, ի դեպ, նա չի վստահում, կարծում է, թե երեք տարին բավարար էր, որպեսզի հին «գվարդիան» գայթակղվի իշխանական բարիքներով և դուրս գա իր վերահսկողությունից։ Փաշինյանը չկարողացավ այդ գործը գլուխ բերել Արգիշտի Քյարամյանով, որին հնարավոր բոլոր պաշտոններին նշանակելուց հետո ստիպված էր Քննչական կոմիտեի ղեկավար նշանակել։

Այժմ էլ, Արմավիրի մարզպետին փոխվարչապետ կարգելով՝ տարատեսակ գործիչների պաշտոններ տալով՝ Նիկոլ Փաշինյանը նոր էլիտա է ձևավորում իր համար։ Ըստ էության, նրա այս մտահղացումն էլ դատապարտված է ձախողման։ Անդեմ և դժգույն կերպարներով նրա համար անհնարին է լինելու այդ գործը գլուխ բերելը։ «Քաղաքացիական պայմանագրի» պայմանական հին անդամները, մեր աղբյուրների փոխանցմամբ՝ չեն վստահում ո՛չ Փաշինյանի նոր կադրերին, ո՛չ էլ սորոսական կամ անորոշ անցյալ ունեցողներին, համախմբվում են մեկ այլ առանցքի շուրջ, փորձում սեփական թիմ ձևավորել։ Այդ առանցքի պայմանական առաջնորդը շրջակա միջավայրի նախարար Ռոմանոս Պետրոսյանն է։ Վերջինս ամենահին ՔՊ-ականներից է, թիմում բավական բարձր վարկանիշ ունի, վստահելի մարդ է համարվում։ Պետրոսյանը նաև չի վախենում իր կարծիքը հայտնել «Քաղաքացիական պայմանագրի» վարչության նիստերին, հարկադրվել Փաշինյանի անհեթեթ գործողություններին։ Հինգվարդիականները նաև նորածիլ կուսակցականներին չեն վստահում, համարում են, որ նրանք արժանի չեն հեղափոխական կոչվելու։

Իշխանափոխությունից հետո մեծ ազդեցություն ունեցող և արևմտյան գրանտներով սնվող «սորոսականները», ի դեպ, անտեր են մնացել։ Վերջիններս հայտնվել են թե՛ կուսակիցների, թե՛ Փաշինյանին ներկայումս քննադատող իրավապաշտպանների թիրախի տակ։ Հաշվի առնելով, որ այս խումբը երբեք էլ վստահություն չի վայելել «Քաղաքացիական պայմանագրում», կարելի է ասել, որ պատգամավորների և պաշտոնյաների մի մեծ զանգված պարզապես դուրս է մնացել ներկուսակցական զարգացումներին մասնակցելու հնարավորությունից։

Արմեն Մելիքյան