Հայկական ամենահին կուսակցությունը նշել է Ֆրանսիայի խորհրդարան անցած իր կուսակիցների թիվը

Eadaily.com-ը գրում է, որ Ֆրանսիայում հունիսի 19-ին կայացած խորհրդարանական ընտրությունների արդյունքում Ազգային ժողովի պատգամավոր են ընտրվել հայկական էթնիկ արմատներով չորս քաղաքացիներ։ Այս մասին հայտարարել է Դաշնակցություն կուսակցության Արևմտյան Եվրոպայի Կենտրոնական կոմիտեն։

Ֆրանսիայի խորհրդարանի ստորին պալատի պատգամավորներ են դարձել Սառա Թանզիլին, Գիյոմ Գասպարյանը, Դիդիե Պարակյանը և Աստղիկ Փանոսյանը։

Սառա Թանզիլին Դաշնակցություն կուսակցության անդամ է և օրենսդիր մարմնի անդամ է ընտրվել նախագահ Էմանուել Մակրոնի կողմնակիցների կուսակցության ցուցակով։

Նշվել է նաև, որ հայկական ամենահին կուսակցության աջակցությունը վայելող թեկնածուների մեծ մասն են անցել խորհրդարան, իսկ գրեթե բոլոր թուրքամետ և ադրբեջանամետ թեկնածուները, որոնց դեմ Դաշնակցությունը քարոզչական աշխատանք է տարել, պարտվել են։

Ֆրանսիայի հայ համայնքը ամենամեծն է Եվրոպայում (մոտ 500 հազար մարդ), և բավական ուժեղ հասարակական և քաղաքական ազդեցություն է վայելում այդ արևմտաեվրոպական ամենամեծ երկրում։

Հիշեցնենք, որ խորհրդարանական ընտրությունների երկրորդ փուլի արդյունքում նախագահ Էմանուել Մակրոնի կողմնակիցները կորցրել են Ազգային ժողովում բացարձակ մեծամասնությունը՝ պատգամավորների թվով ստանալով միայն պարզ մեծամասնություն։ Ձախ կուսակցությունների NUPES կոալիցիան դարձել է խորհրդարանի հիմնական ընդդիմադիր ուժը։ «Մակրոնիստները» ստացել են 245 մանդատ, ձախակողմյան դաշինքը՝ Ժան Լյուկ Մելանշոնի գլխավորությամբ՝ 131։ Մարին Լը Պենի ծայրահեղ աջ «Ազգային միավորում» կուսակցությունը խորհրդարան է մտել «պատմական» արդյունքով՝ ստանալով 89 մանդատ։ Աջ «Հանրապետականները», կորցնելով առաջին ընդդիմադիր կուսակցության դիրքերը, ԱԺ-ում ունեն ավելի քան 60 պատգամավոր։

Դաշնակցությունը Հայաստանում ընդդիմադիր է Նիկոլ Փաշինյանի իշխանությանը: Այն «Հայաստան» դաշինքի մաս է, որը ղեկավարում է Հայաստանի հանրապետության նախկին նախագահ Ռոբերտ Քոչարյանը։ Այդ քաղաքական միավորումը ունի մեծությամբ երկրորդ խմբակցությունը երկրի խորհրդարանում։