Ուկրաինայի ապագան ՆԱՏՕ-ում է. Ստոլտենբերգ
Международное
ՆԱՏՕ-ի գլխավոր քարտուղար Ենս Ստոլտենբերգը հույս է հայտնել, որ Վիլնյուսում հուլիսի 11-12-ին կայանալիք Հյուսիսատլանտյան դաշինքի գագաթնաժողովում դաշինքի անդամները «կվերահաստատեն աջակցությունն Ուկրաինային այնքան ժամանակ, որքան անհրաժեշտ կլինի»։ Այս մասին Ստոլտենբերգն ասել է ապրիլի 20-ին Կիևում Ուկրաինայի նախագահ Վլադիմիր Զելենսկու հետ հանդիպման արդյունքներով համատեղ ճեպազրույցում, հայտնում է gordonua.com-ը:
«Անդամակցության հարցը, անվտանգության երաշխիքները կլինեն հանդիպման օրակարգի կարևոր բաղկացուցիչները: ՆԱՏՕ-ն դրան պատրաստվում է Վիլնյուսի գագաթնաժողովում»,- ընդգծել է Ստոլտենբերգը:
«Ուկրաինայի ապագան ՆԱՏՕ-ում է: Դաշինքը համաձայն է սրա հետ, միևնույն ժամանակ, ՆԱՏՕ-ի հիմնական նպատակն է ապահովել Ուկրաինայի առավելությունը, որպեսզի Ուկրաինան երաշխավորված լինի որպես ինքնիշխան ժողովրդավարական պետություն Եվրոպայում... Մեր ցուցաբերած աջակցությունը հնարավոր է դարձնում ՆԱՏՕ-ին ապագա անդամակցությունը», - հավելել է գլխավոր քարտուղարը:
Զելենսկին իր հերթին նշել է, որ Ուկրաինային «ավելին է պետք», քան ՆԱՏՕ-ի հետ հարաբերությունների ներկայիս ձևաչափը։
«Մենք ցանկանում ենք հասկանալ, թե երբ Ուկրաինան կմիանա ՆԱՏՕ-ին, մենք նաև անվտանգության երաշխիքներ ենք ուզում այդ ճանապարհին»,- ասել է նախագահը։
