Վրաստանի խորհրդարանի լիագումար նիստը չեղարկվել է ցուցարարների՝ շենք ներխուժելու փորձի պատճառով

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Վրաստանի խորհրդարանի լիագումար նիստը չեղարկվել է մայիսի 1-ի հանրահավաքի ժամանակ ցուցարարների շենք ներխուժելու փորձի պատճառով։ Այս մաիսն հայտնում է ՏԱՍՍ-ը:

Հիշեցնենք, որ նախօրեին Վրաստանում ցուցարարները փորձել են կոտրել խորհրդարանի ծառայողական մուտքի դարպասները, ինչից հետո ոստիկանությունը նրանց դեմ կիրառել է ջրցան մեքենաներ և արցունքաբեր գազ։ Այս մասին հայտնել է newsgeorgia.ge կայքը՝ Վրաստանի ՆԳՆ մամուլի ծառայությանը հղումով։

«Այն բանից հետո, երբ ՆԳՆ ստորաբաժանումները լքել են խորհրդարանի հարակից տարածքը, հանրահավաքի մասնակիցները դրսևորել են ագրեսիա և փորձել վնասել օրենսդիր մարմնի մուտքի երկաթե դարպասները։ Կարգ ու կանոնը վերականգնելու նպատակով ՆԳՆ աշխատակիցները կիրառել են օրենքով նախատեսված հատուկ միջոցներ»,- ասված է հաղորդագրությունում։

Վրաստանի առողջապահության նախարարությունը հայտնել է, որ Թբիլիսիում խորհրդարանի մոտ այսպես կոչված «օտարերկրյա գործակալների մասին օրենքի» դեմ բողոքի ակցիայի ութ մասնակից վիրավորվել է և հոսպիտալացվել։

«Տուժածները ստացել են տարբեր տեսակի վնասվածքներ, այդ թվում՝ դեմքի, գլխի և մարմնի տարբեր մասերի վնասվածքներ, ինչպես նաև թունավորում և շնչուղիների հետ կապված բարդություններ»,- ասվում է գերատեսչության հաղորդագրության մեջ։

Հազարավոր մարդիկ մայիսի 1-ի երեկոյան հավաքվել էին Վրաստանի խորհրդարանի մոտ՝ պահանջելով հետ կանչել «ռուսական» որակվող օրենքը։

Վրաստանի նախագահ Սալոմե Զուրաբիշվիլին աջակցություն է հայտնել Թբիլիսիում «օտարերկրյա գործակալների մասին օրինագծի» դեմ բողոքող ցուցարարներին՝ միաժամանակ կոչ անելով չհավաքվել Վրաստանի խորհրդարանի դարպասների մոտ և դրանով իսկ չսադրել ոստիկանությանը։

«Կան բաներ, որոնք դուք չպետք է անեք, հանգիստ թողեք խորհրդարանի դարպասները: Հանգիստ թողեք այս դարպասը, այնտեղ ոչինչ չի լինում։ Այդ օրենքն այնտեղ արդեն երկրորդ ընթերցմամբ ընդունվել է, և մեր պայքարը գնում է դեպի ընտրություններ, դեպի բոլոր այն օրենքները, որոնք վերջերս ընդունվել են այս իշխանությունների կողմից և մեզ հեռացնում են եվրոպական ուղուց»,- ասել է Զուրաբիշվիլին ուղերձում:

Վրաստանում բողոքի ցույցերի պատճառ է դարձել «Օտարերկրյա ազդեցության թափանցիկության մասին» օրինագծի քննարկումը։ Վրացական ընդդիմությունը նախագիծն անվանել է «օտարերկրյա գործակալների մասին ռուսական օրենքի համարժեքը»։ Մայիսի 1-ին օրինագիծը երկրորդ ընթերցմամբ ընդունվել է խորհրդարանում։ Դրան աջակցել է 83, դեմ է արտահայտվել 23 պատգամավոր։

Տեսանյութերը կարող եք դիտել Tert.am-ի թելեգրամյան ալիքում: