Ռուբեն Վարդանյանը հարցազրույց է տվել ֆրանսիական պարբերականին

Ավտորիտար երկրում, որտեղ խոսքի ազատությունը ճնշված է, բնապահպանական ակտիվիստների մասին խոսելը զավեշտ է։ Արցախի պետնախարար, օպերատիվ շտաբի ղեկավար Ռուբեն Վարդանյանն այս մասին ասել է ֆրանսիական հեղինակավոր «Le Figaro» պարբերականին։

Ֆրանսիական թերթը ծավալուն անդրադարձ է կատարել Ադրբեջանի կողմից Արցախի շրջափակմանն ու դրա պատճառներին։ Լրագրող Էլիզաբեթ Փիրսոնը զրուցել է պետնախարար Ռուբեն Վարդանյանի հետ։ Վերջինս նշել է, թե վերջին 10 տարիների ընթացքում Ադրբեջանում բացարձակապես բնապահպանական ցույցեր չեն եղել։

«Ինչո՞ւ հանկարծ նրանք արթնացան»,- հարցադրում է անում պետնախարարը՝ նշելով, որ պատրաստ է ցանկացած պահի ընդունել միջազգային հետաքննող հանձնաժողովին, ապացուցելու, որ հանքարդյունաբերության իրականացման համար բոլոր բնապահպանական պայմանները պահպանվում են։

Ոսկու հանքը, որին վերաբերում է խոսքը Կաշենի հանքավայրն է, որը գտնվում է 2020 թվականի հրադադարի շրջանակներում Լեռնային Ղարաբաղի Հանրապետությանը մնացած տարածքի մի մասում։ Հենց այս հանքավայրի նկատմամբ է Ադրբեջանի հիմնական ախորժակը, ուստի և բնապահպանական կեղծ ակցիաներով փորձում են հայկական կողմին ստիպել հրաժարվել նաև այդ հանքավայրից։ Ի տարբերություն ադրբեջանցիների, որոնց կեղծիքներն առանձնապես լուրջ չեն ընկալվում այլևս միջազգային հանրության կողմից, հարկ է արձանագրել, որ Ռուբեն Վարդանյանին հաջողվել է ոչ միայն իրավիճակը վերահսկողության տակ պահել Արցախում, այլ նաև լրջորեն աշխատել միջազգային կառույցների, ԶԼՄ–ների հետ։

Վերջին օրերի ընթացքում պետնախարարը մի ամբողջ շարք հարցազրույցներ է տվել հեղինակավոր պարբերականների։ Արցախի մասին այս օրերին ավելի շատ են խոսում, քան անգամ 44- օրյա պատերազմի ժամանակ, ինչը, իհարկե, օբյեկտիվ է, սակայն պայմանավորված է նաև հենց պետնախարարի անձով, որևէ այլ ներկայացուցչի պարագայում անհամեմատ ավելի բարդ կլիներ հարցին այսպիսի սրություն և լրջություն հաղորդելը։ Նիկոլ Փաշինյանն ու նրա թիմը միտումնավոր սրում են Ռուսաստանի հետ հարաբերությունները Անվտանգության խորհրդի քարտուղար Արմեն Գրիգորյանը նախօրեին հայտարարել էր, թե Հայաստանին ճնշում են Միութենական պետության անդամակցելու հարցով։

Նա մի շարք աղմկահարույց հայտարարություններ էր արել՝ մեղադրանքների սլաքն ուղղելով Ռուսաստանի ուղղությամբ։ Ռուսաստանի նախագահի մամուլի քարտուղար Դմիտրի Պեսկովը երեկ ստիպված անդրադարձել և հայտարարել է, թե Արմեն Գրիգորյանի հայտարարությունները կապված Հայաստանին Միութենական պետության հարցով ճնշելու հետ սադրիչ են։

«Նման հայտարարությունները կարելի է համարել սադրիչ, դրանք չեն համապատասխանում իրականությանը, ռուս պաշտոնյաներից ոչ ոք դա չի ասել և որևէ մեկի միջոցով դա չի ներկայացվել հայկական կողմին»,- ասել է Պեսկովը։

Իհարկե անհնար է կարծել, թե անվտանգության խորհրդի քարտուղարը նման հայտարարություններ կարող էր անել առանց իր վերադասի անմիջական ցուցումների։ Նրա վերադասն էլ երեկ Սանկտ Պետերբուրգում հանդիպել է Ռուսաստանի նախագահ Վլադիմիր Պուտինի հետ, երկրների ղեկավարների՝ թանգարանում այցից հետո, առանձնազրույցի սկզբում մինչ Վլադիմիր Պուտինն անդրադառնում էր տնտեսական ոլորտի իրավիճակի դրական զարգացումներին, Նիկոլ Փաշինյանը հայտարարել է, թե այս պահին գլխավոր հարցը, ամենահրատապ խնդիրը Լաչինի միջանցքի ճգնաժամն է։

Ըստ Փաշինյանի սա ռուս խաղաղապահների պատասխանատվության գոտին է Լեռնային Ղարաբաղում։ «Եռակողմ հայտարարության համաձայն Լաչինի միջանցքը պետք է գտնվի ռուս խաղաղապահների հսկողության ներքո, իսկ Ադրբեջանը պիտի երաշխավորի ուղևորների, բեռների, մարդկանց անխոչընդոտ անցումը»,- ասել է Փաշինյանը և հավելել, թե ստացվում է, թե Լաչինը ռուս խաղաղապահների վերահսկողության տակ չէ։

Իհարկե, թե՛ Արմեն Գրիգորյանի, թե՛ Փաշինյանի հայտարաություններում ճշմարտության հատիկ կա, սակայն ստեղծված իրավիճակում հարցը ռուսական կողմի հետ բանակցություններով կարգավորելու, ռուսական կողմի հետ ավելի մեղմ և ճիշտ քաղաքականություն վարելու փոխարեն, փաշինյանական վարչախումբն ավելի սրում իրավիճակը և թե՛ հայ հանրության և թե՛ միջազգային հանրության մոտ տպավորություն ստեղծում, թե ռուսներն ընդհանրապես չեն կարողանում կատարել իրենց պարտականությունները։

Չի բացառվում, որ ինչ որ պահի Արևմուտքը նույնիսկ հարց բարձրացնի ռուսական խաղաղապահ զորախումբը հանելու, նրանց փոխարեն միջազգային խաղաղապահներ ներգրավելու հարցը, ինչը , թերևս, հենց այն է, ինչին ձգտում է Նիկոլ Փաշինյանը։ 

Լարիսա Ավագյան